विराटनगर  -  सरकारको संयन्त्रले काम गर्न नसक्दा विराटनगरमा लकडाउन प्रभावकारी बन्न सकेको छैन । 

विराटनगर महानगरपालिकाले सुरुका दिनमा कडाइ थाल्ने जनाएको भएपनि लकडाउन सुरु भएको एक महिना २ दिन पुग्दा समेत त्यसको पूर्ण पालना हुन सकेको छैन ।  

आन्तरिक रुपमा वडा तहबाट हुनुपर्ने काम समेत नभएको स्थानीयले बताएका छन् । कोरोनाबारे सचेत नागरिक भने कुनै भिडभाड नभए हुन्थ्यो भन्ने सोच्छन् । 
तर तरकारी खरिद बिक्रीको लागि हाटबजारजस्तै भिड लाग्ने गरेको छ । विराटनगर महानगरपालिका वडा नम्बर ६ को शान्ति चोकमा शुुक्रबार बिहानै हाट बजारजस्तो भिड लागेको थियो । 

अन्य दिनझैँ बिहानै तरकारी किन्ने र बेच्नेको उस्तै भिडले गर्दा  कोरोना सङ्क्रमणको त्रास बढेको स्थानीयहरु बताउँछन्  । शान्ति चोकमा मात्र होइन, अन्य क्षेत्रमा पनि यस्तै भिड रहेको  विराटनगरका रामकृष्ण सिंहले बताउनुभयो ।

‘यस्ता प्रवृतिका व्यक्तिलाई प्रहरीले भाटा हान्नुपर्ने रहेछ,’ विराटनगरका गुणराज रिजालले भन्नुभयो, ‘प्रहरीले हरेक दिन माइकिङ्ग गरेर बाहिर ननिस्कन भनेको छ । यस्ता चरित्र भएका व्यक्तिले आफूसहित अरुलाई पनि खतरामा पारेका छन् ।’

केही दिनअगाडि विराटनगरको बसपार्क नजिक रहेको गुद्री बजारमा पनि सयौँको संख्यामा सर्वसाधारणको भिड लागेपछि प्रशासनले बन्द गराएको थियो ।