काठमाण्डौ - काठमाण्डौ र ललितपुरका विभिन्न ठाउँमा कन्ट्याक्टलेस अर्थात् हातले नछोइकन साबुन पानीले हात धुन मिल्ने प्रविधि जडान गरिएको छ ।

कीर्तिपुर प्रवेशद्वार, कीर्तिपुर नगरपालिकाको कार्यालय भवन अगाडि र फोहरमैला प्रशोधन केन्द्र, नयाँबजार अगाडि कन्ट्याक्टलेस स्थापना गरिएको छ ।

यस्तै कीर्तिपुर पाँगा दोबाटो, नगाउँ दोबाटो र ढोकाशी टोलमा खाना वितरण गर्ने ठाउँमा पनि स्पर्शरहित हात धुने स्टेशन स्थापना गर्ने तयारी छ ।

यसअघि ललितपुरको जावलाखेलमा रहेको महानगरीय प्रहरी परिसरभित्र हातले र ललितपुरको लगनखेल बसपार्कमा हातले सम्पर्क नगरी हात धुन मिल्ने प्रविधि जडान गरिएको थियो ।

कोरोना भाइरस हातको माध्यमबाट धारा र धाराको माध्यमबाट अरु व्यक्तिलाई सर्ने जोखिम भएकाले हातले नछोइकन हात धुन मिल्ने प्रविधि ल्याइएको हो ।

सरकारले वाटर एड नेपाल र अरु साझेदार संस्थासँग मिलेर काठमाण्डौ उपत्यकाको विभिन्न ५० ठाउँ र सिरहाको लहानमा २५ वटा गरी ७५ वटा ठाउँमा यस्तै प्रविधिको हात धुने ठाउँ स्थापना गर्ने भएको छ ।