मोरङ - कोशी अस्पताल कोभिड–१९ उपचार केन्द्रमा उपचार गराइरहेका ६ जनालाई डिस्चार्जको तयारी गरिएको छ । 

उपचार केन्द्रमा उपचाररत ३१ जनामध्ये ६ जनामा दोस्रो र तेस्रो पटक पनि कोरोना संक्रमण नेगेटिभ देखिपछि डिस्चार्जको तयारी गरिएको हो । उदयपुरको भुल्केबाट वैशाख ५ र ६ गते अस्पतालमा ल्याएर भर्ना गरिएका १३ जनामध्ये ६ जनामा कोरोना भाइरस नेगेटिभ देखिएको हो ।

प्रदेश १ सामाजिक विकासमन्त्री जीवन घिमिरेका अनुसार दोस्रो र तेस्रो पटकको परीक्षणमा समेत कोरोना संक्रमण नदेखिएपछि उनीहरुलाई बुधबार बिहान घर पठाइने भएको छ । 

कोरोना भाइरस नेगेटिभ देखिएका ६ जनालाई रानीस्थित मस्जिदमा रहेको क्वरेण्टीनमा सारिने कोशी अस्पताल मेडिकल सुपरिटेन्डेन्ट डा.संगिता मिश्राले जानकारी दिनुभयो । आज रातभरमा उनीहरुको थप एउटा रगत परीक्षण समेत गरिनेछ ।

सुरुका १३ जनाको यस अगाडि स्वाब संकलन गरी परीक्षण गरिएको छ । त्यसपछि पुनः दोस्रो पटक सोमबार स्वाब संकलन गरिएको थियो । दोस्रो स्वाबमा ६ जनामा नेगेटिभ देखिएपछि डिस्चार्ज गरिने तयारी गरिएको छ । 

सोमबार नै अस्पतालमा भर्ना भएका थप १५ जनाको समेत स्वाब संकलन गरिएको थियो ।