काठमाण्डौ - नेपाली कांग्रेसले कोरोना संक्रमणपछिको जटिल अवस्था र तत्काल चाल्नुपर्ने कदमबारे  सरकारको ध्यानाकर्षण गराएको छ । 

सभापति शेरबहादुर देउवाले आज प्रधानमन्त्री केपी शर्मा ओलीलाई टेलिफोन गरी तत्काल आवश्यक कदम चाल्न आग्रह गर्नुभएको हो । 

कोरोना संक्रमण परीक्षणलाई जोड दिन, त्रासमा रहेका नागरिकलाई आश्वस्त पार्न र देशभर पीसीआर विधिबाट परीक्षण तीव्र बनाउन प्रधानमन्त्रीलाई आग्रह गर्नुभएको छ । 

उहाँले कुबेतमा सेल्टरमा राखिएका झण्डै ३ हजार, मध्यपूर्व तथा अरु देशमा अप्ठ्यारोमा रहेका नेपालीलाई व्यवस्थित योजना बनाएर उद्धार गर्न माग गर्नुभएको छ । यसअघि  कांग्रेसले आर्थिक वर्ष २०७७/०७८ को नीति, कार्यक्रम र बजेटबारे निजी क्षेत्रसँग छलफल गरेको थियो ।

कांग्रेसले आज पार्टी कार्यालय सानेपामा निजी क्षेत्रका विभिन्न छाता संगठनहरुको नेतृत्वसँग छलफल गरेको हो । छलफलमा कांग्रेस सभापति शेरबहादुर देउवाले उद्योगी व्यवसायीले दिएका सुझावलाई संसद र सरकारसम्म लैजाने बताउनुभएको थियो ।