डाेटी – कैलालीको सहजपुर हुँदै डोटीको दिपायल जोड्ने सहजपुर–वीपीनगर–बोगटान सडकको निर्माण काममा ढिलासुस्ती भएको छ । प्रधानमन्त्री केपी शर्मा ओलीले २०७५ फागुन ७ गते शिलान्यास गर्नुभएकाे सडक निर्माणमा ढिलासुस्ती भएको हो ।

सडकको निर्माण काम आउँदो असारमा सक्ने गरी २०७५ मङ्सिर २२ गते पीआरएल कुमार जेभीसँग सम्झौता भएको थियो तर अहिलेसम्म ३५ प्रतिशत मात्रै काम भएको छ । भारतको एक्जिम बैंकको ऋण सहयोगमा निर्माण हुन लागेको सडक एक करोड ९६ लाख ९३ हजार तीन सय १२ अमेरिकी डलरमा निर्माण सम्झौता भएको हो ।

शिलान्यास भएको केही समय कामले गति लिएको तर कोरोना महामारीका तथा स्थानीयवासीको अवरोधका कारण तोकिएकाे समयमा पूरा हुन नसक्ने देखिएको सडकका आयोजना प्रमुख उज्ज्वल श्रेष्ठले बताउनुभयो ।

सडकको काम अलपत्र हुँदा हिलो र धुलोको सास्ती खेप्नुपरेको कैलालीको चुरे गाउँपालिका १ का केशवबहादुर सिंहले गुनासो गर्नुभयो । कोरोनाको सङ्क्रमण बढ्न थालेपछि कामदार घर फर्किने तयारीमा रहेकाले काम रोकिने अवस्था आएको आयोजनाले जनाएको छ ।

सडक निर्माणपछि कैलालीको चुरे र डोटीको दक्षिणी भेगका बासिन्दा लाभान्वित हुने भए पनि ढिलासुस्ती हुँदा निराश हुनुपरेको बडीकेदार गाउँपालिकाका भक्तबहादुर साउदले बताउनुभयो ।