डोटी – डोटीमा खानेपानीको एउटा आयोजना ठेकेदारबीच पटक–पटक बिक्री हुँदा काम गुणस्तरहीन भएको उपभोक्ताले गुनासो गरेका छन् । डोटीको शिखर नगरपालिका वडा नं ४, ५ र ६ अन्तर्गत पर्ने मुडभरा, पच्नाली, तिजाली खानेपानी आयोजनाको काममा गुणस्तरहीन काम भएको सार्वजनिक भएको हाे ।

ठेक्का पाएको नागार्जुन जेभीआर कम्पनीले यस आयोजनाको काम पेटी ठेक्कामार्फत कमसल खालको सामग्री प्रयोग गरी काम गराउँदा गुणस्तरहीन कार्य भएको स्थानीयवासीको आरोप छ । ठेक्का पाएको निर्माण कम्पनीले भ्याटबाहेक दुई करोड ९१ लाख ४९ हजार ६४ रुपैयाँ १५ पैसामा ठेक्का सम्झौता गरेको थियो । 

यस कम्पनीले सङ्घीय खानेपानी तथा ढल व्यवस्थापन विभागको क्षेत्रीय कार्यालय धनगढीसँग ६ महिनामा काम सक्ने गरी २०७७ असोज ९ गते सम्झौता गरेको थियो । तर तोकिएको समयमा काम सम्पन्न हुन सकेन । ठेक्का सम्झौताअनुसारको काम गर्नुपर्ने निर्माण कम्पनी जेभीआरले पेटी ठेकेदारलाई ठेक्का बेचेकाले समयमै काम सम्पन्न हुन नसकेको स्थानीयवासीको आरोप छ ।

ठेक्का पाएको कम्पनीका प्रतिनिधि तथा दिपायल सिलगढी नगरपालिका–२ का स्थानीयवासी धनश्याम पाठकले यस आयोजना जोरायल गाउँपालिका–१ घण्टेश्वर बस्ने खेमबहादुर मगरलाई बिक्री गरेको तथ्यबाहिर आएको हो । पाठक पहिलो पक्ष बनेर दोस्रो पक्ष खेमबहादुर मगरलाई ठेक्का रकमको ६० प्रतिशत पाउने गरी पेटी ठेक्का दिएको लिखित प्रमाण फेला परेको छ । 

यसैगरी खेमबहादुर मगरले आफूले पाएको ठेक्का पनि कमिसनको आधारमा तेस्रो व्यक्तिलाई बिक्री गरेको पाइएको छ । यसरी निर्माण कम्पनीले ठेक्का सम्झौताअनुसार काम नगर्दा र कमिसनको आधारमा पेटी ठेकेदारलाई काम बेच्दा समयमा काम नसकिने र काममा पनि गुणस्तर नहुने गरेको छ ।

त्यही ठेक्कालाई फेरि जोरायल गाउँपालिका–३ सरस्वतीनगर बस्ने लीला ओलीलाई दोस्रो पक्ष बनाएर खेमबहादुर मगरले बिक्री गरेको प्रमाण पनि फेला परेको छ । उनीहरूबीच २०७७ कात्तिक १ गते लिखित सम्झौता भएको कागजको प्रमाण फेला परेको छ । खेम मगरले लीला ओलीलाई यस आयोजना एक करोड ३० लाख रुपैयाँमा बिक्री गरेको देखिन्छ । मगरले पनि ठेक्काको ६० प्रतिशत पाउने गरी तिजाली–पचनाली–मुडभरा खानेपानी आयोजना बेचेको पाइएको छ ।

खेमबहादुर मगरले पाएको ठेक्का फेरि कमिसनका आधारमा तेस्रो व्यक्तिलाई समेत बिक्री गरेको पाइएको हो । दुई करोड ९१ लाख रुपैयाँको ठेक्कालाई एक करोड ७० लाखमा बिक्री गरेर काम भइरहेको स्थानीयवासी शिवराज भट्टको आरोप छ । यसरी ठेक्का सम्झौता गरेको निर्माण कम्पनीले कमिसन लिएर ठेका बेच्दा र कमिसनै कमिसनमा योजना निर्माण हुँदा गुणस्तरहीन निर्माण सामग्रीको प्रयोग गरेर काम हुने गरेको छ । यस खानेपानी आयोजनाका अध्यक्षको निधन भएकाले ठेकेदारले अन्य उपभोक्तालाई हातमा लिएर काम गरेकाले गुणस्तर खस्किँदो अवस्था देखिएको स्थानीयवासी बताउँछन् । 

यस विषयमा निर्माण कम्पनीका प्रतिनिधि धनश्याम पाठकसँग बुझ्दा उहाँले आफूले आयोजनाको ४० प्रतिशत निर्माण कम्पनीको हुने र ६० प्रतिशत पेटी ठेकेदारको रहने गरी काम दिएको स्वीकार गर्नुभयो ।

उहाँले भन्नुभयो, ‘मैले पेटी ठेक्कामा काम दिएको हुँ, पेटी दिएकाले के–के गरे थाहा भएन, विप्लव नेतृत्वको नेकपाका कार्यकर्ताले १५ प्रतिशत रकम मागेकाले समस्या भएको हो ।’ काम पेटी ठेक्कामार्फत दिएको भए पनि लाग्ने सामग्री तथा खर्च आफूले तिर्ने उहाँले जानकारी दिनुभयो । 

सङ्घीय खानेपानी तथा ढल व्यवस्थापन कार्यालय धनगढीका प्रमुख प्रकाश रावल खानेपानीको काम सम्झौताअनुसार नभए र गुणस्तरीय काम नभएको भए बिल पास नहुने बताउनुहुन्छ । 

शिखर नगरपालिका अन्तर्गत पर्ने तिजाली–पच्नाली–मुडभरा खानेपानी आयोजनाको १२ हजार लिटरको फिल्टरेशन ट्याङ्की निर्माणका लागि बजेट विनियोजन गरिएको थियो ।   

ठेक्का बेचेकाे पत्र–