डोटी – उच्च अदालत दिपायल राजपुरले कैलालीको धनगढी उपमहानगरपालिकाका मेयर नृपबहादुर वडलाई जातीय विभेद हुने गरी गाली गर्ने एक व्यक्तिलाई दुई महिना कैद सजाय सुनाएको छ । 

कैलाली बोराडाडीका ओमप्रकाश पाण्डेले सामाजिक सञ्जालमा जातीय विभेद हुने गाली दिएको भन्दै उच्च अदालतले दुई महिना कैद सजाय सुनाएको हो । उच्च अदालत दिपायलका कामु मुख्य न्यायाधीश टेकनारायण कुँवर र न्यायाधीश सागर विष्टको संयुक्त इजलासले प्रतिवादीले अदालतसमक्ष गल्ती महसुस गरेको अवस्थालाई ध्यानमा राख्दै न्यूनतम सजाय गर्दासमेत न्यायको मकसद पूरा हुने हुँदा दुई महिना सजाय सुनाइएको अदालतले जनाएको छ ।

२०७७ साल वैशाख २७ गते पाण्डेले फेसबुक पेजमा मेयर वडलाई लक्षित गर्दै गाली गरेको भन्दै उजुरी परेको थियो । तत्कालीन समयमा पतिराम सोवसहित चार जनाले पाण्डेविरुद्ध जिल्ला प्रहरी कार्यालय कैलालीमा जाहेरी दिएका थिए । त्यही मुद्दामा कैलाली जिल्ला अदालतले २०७७ मङ्सिर ३० गते प्रतिवादी पाण्डेलाई पाँच सय रुपैयाँ जरिबाना मात्र गरेको थियो । उच्च अदालत दिपायलले जिल्ला अदालतको फैसला उल्टाउँदै प्रतिवादीलाई दुई महिना कैद र बीस हजार रुपैयाँ जरिबाानाको सजाय सुनाएको हो । कैलाली जिल्ला अदालतले पुरानो कानुनी व्यवस्था प्रयोग गरी गरेको फैसला त्रुटिपूर्ण भएको इजलासको ठहर छ ।