काठमाण्डौ – संस्कृति, पर्यटन तथा नागरिक उड्डयन मन्त्री प्रेमबहादुर आलेले विश्वको सर्वोच्च शिखर सगरमाथा आरोहणका लागि भारतीय अभिनेता सलमान खानलाई निमन्त्रणा दिनुभएको छ । ओडीसी इन्टरटेनमेन्ट परिवार लाजिम्पाटले आज बुधवार सोल्टी होटलमा आयोजना गरेको मन्त्री आले र अभिनेता सलमानबीचको भिडियो संवादमा मन्त्री आलेले सगरमाथा आरोहणका लागि निमन्त्रणा दिनुभएको हाे । 

संवादका क्रममा मन्त्री आलेले भन्नुभयो, सलमानजी सगरमाथा विश्वमै सर्वोच्च शिखरका नामले चर्चित छ, सगरमाथा आरोहणसहित सगरमाथा क्षेत्रमा हवाई यात्रा गर्नका लागि म निमन्त्रणा गर्दछु । नेपालमा तपाईँका धेरै फ्यान छन् । नेपाल आएर यहाँका विभिन्न पर्यटकीय क्षेत्रमा टीभी शो, चलचित्र सुटिङ गर्नुहोस् ।’ नेपालमा कोरोना सङ्क्रमण घट्दै गएकाले नेपाल अहिले पर्यटनका लागि खुला भएको पनि मन्त्री आलेले जानकारी गराउनुभयो । संवादकै क्रममा मन्त्री आलेले सलमान खानका चलचित्रका बारेमा प्रशंसा गर्नुभएको थियो ।

मन्त्री आलेले दिनुभएको निमन्त्रणा स्वीकार गर्दै अभिनेता खानले आफू नेपाल आउने र विश्वको सर्वोच्व शिखर सगरमाथा आरोहण गर्ने बताउनुभयो । उनले भने, ‘म केही समयमा नेपाल आउँछु, तपाईँले दिनुभएको निमन्त्रणाअनुसार सगरमाथा आरोहण गर्नेछु र भ्रमण गर्नेछु ।’ यसैगरी अभिनेता खानले मन्त्री आलेको यो प्रस्तावलाई सकारात्मक रूपमा लिँदै नेपाल सुन्दर देश रहेको र यसको पर्यटन प्रवर्द्धनमा आफ्नो तर्फबाट सहयोग गर्ने वचन पनि दिए । 

अभिनेता खानले काठमाण्डौको दशरथ रङ्गशालामा हुने कार्यक्रमका लागि आउँदो जेठ १४ गते नेपाल आउन लागेको जानकारीसमेत गराए । मन्त्री आले र अभिनेता खानबीच झन्डै १० मिनेट लामो भिडियो संवाद भएको थियो ।

दशरथ रङ्गशालामा हुने ‘दबङ रिलोडेड टुर’ का लागि ओडीसी इन्टरटेनमेन्टले भारतीय अभिनेता सलमान खानलाई नेपाल ल्याउन लागेको हो ।