धनकुटा – जिल्ला कारागार धनकुटामा रहेका अधिकांश कैदीबन्दीको आँखामा समस्या देखिएको छ ।

संविधान दिवसको अवसरमा नेपाल नेत्र ज्योति संघ धनकुटाले मंगलबार कारागार कार्यालय धनकुटामा गरेको परिक्षणमा ६३ जना कैदीबन्दीहरुमा आँखामा समस्या देखिएको हो ।

चार महिलासहित ७२ कैदीबन्दी रहेको कारागारमा १२ जनालाई चस्मा लगाउनु पर्ने देखिएको छ भने अन्य सबैले औषधि प्रयोग गर्नु पर्ने भएकाले औषधि वितरण गरिएको नेपाल नेत्र ज्योति संघ धनकुटा अध्यक्ष द्रोण गुरागाँईले बताउनुभयो ।

बढी संक्रमण भएका १२ जना कैदीबन्दीलाई धनकुटा नगरापालिका–६, मा रहेको आँखा अस्पतालमा जाँच गरी चस्मा निःशुल्क उपलब्ध गराइने अध्यक्ष गुरागाँईले जानकारी दिनुभयो ।

जिल्ला अदालतको पुरानो भवनमा २५ जना क्षमताको कारागारमा ६५ जना कैदीबन्दी रहेका छन् । पटक–पटकको भूकम्पका कारण जीर्ण अवस्थामा रहेको कारागार ओसिलो भएका कारण पनि कैदीबन्दीहरुमा आँखाको संक्रमण बढेको चिकित्सकले बताएका छन् ।