मकवानपुर – मकवानपुरमा पानी परेकाले मतदान गर्न समस्या भएको छ । बिहान एक चरणमा धेरै मतदान गरिए पनि दिउँसो भने पानी परेकाले मतदान गर्नका लागि लाइन बस्न पनि समस्या भएको हो । 

जिल्लाका ३ सय ६५ वटा मतदान केन्द्रहरु मध्ये धेरै मतदान केन्द्र विद्यालयमा भएकाले केही सजिलो भए पनि मतदाताहरुले भने कठिनाइ भोगेका छन् । मतपेटिका भने सुरक्षित गरिएको छ । हेटौंडालगायत धेरै ठाउँमा दिउँसो ठूलो पानी परेकाले धेरै मतदाताहरु पानी रोकिएपछि मात्र मतदान गर्न जाने तयारी गरेका छन् । 

वर्षाको कारण मकवानपुरको इन्द्रसरोवर गाउँपालिकामा मतदान गर्न असहज भएपछि केही मतदान केन्द्रमा मतदान कार्यक्रम स्थगित नै गरिएको छ । इन्द्रसरोवर १ मा रहेको चन्द्रोदय प्राविमा केही समयको लागि मतदान स्थगित गरिएको हो । वर्षा रोकिएपछि मतदान कार्यलाई निरन्तरता दिने बताइएको छ । त्यस्तै, त्यही गाउँपालिका वडा नम्बर २ मा रहेको पञ्चकन्या मावि मतदान केन्द्रमा भने पानीको प्रवाह नगरी उत्साहजनक रुपमा मतदान भैरहेको छ । पानीबाट जोगिन प्लास्टिक र छाताको सहारामा इन्द्रसरोवरका मतदाताहरुले मतदान गरिरहेका छन् । 

मकवानपुरका दश वटा पालिकाका ३ सय ६५ वटा मतदान केन्द्रबाट दुई लाख ९४ हजार ९१९ मतदाताले मतदान प्रक्रियामा सहभागिता जनाउँदैछन् । जसमध्ये १ लाख ४ ९ जना पुरुष , १ लाख ४४ हजार ९ सय ५९ जना महिला तथा ६ जना तेस्रो लिङ्गी रहेको निर्वाचन आयोग वाग्मती प्रदेश कार्यालय मकवानपुरको तथ्याङ्कमा उल्लेख छ ।