काठमाण्डाै - नेपालले महिला टी–२० क्रिकेट शृङ्खलाको दोस्रो खेलमा मलेसियालाई ७ विकेटले हराएको छ । जितसँगै नेपालले पाँच खेलको शृङ्खलामा एक/एकको बराबरी गरेको छ ।

आज बिहान बाङ्गीमा भएको खेलमा मलेसियाले दिएको ९८ रनको लक्ष्य नेपालले १७ ओभर ३ बलमा ३ विकेट गुमाएर भेट्टायो । नेपालका लागि कप्तान रुविना श्रेत्रीले अविजित सर्वाधिक २९ रन बनाइन् । त्यस्तै, कविता कुँवरले २६ र सीता राना मगरले २३ रन जोडिन्।

मलेसियाका ऐश्या एलिसा, निक नुर र विनीफ्रन्ड आनीले समान एक/एक विकेट लिए । त्यसअघि टस जितेर पहिला ब्याटिङ गरेको मलेसियाले निर्धारित २० ओभरमा ५ विकेट गुमाएर ९७ रन बनाएको थियो । मलेसियाका लागि मास एलिसा यासमिन जुक्किफीले सर्वाधिक २८ रन बनाइन् ।

नेपालका रुविना क्षेत्रीले २ तथा इन्दु बर्मा र कविता कुँवरले एक/एक विकेट लिए । हिजो भएको पहिलो खेलमा नेपाल मलेसियासँग ५ विकेटले पराजित भएको थियो । शृङ्खला अन्तर्गत पर्सि बिहीवार तेस्रो, शनिवार चौथो र आइतवार पाँचौँ तथा अन्तिम खेल हुनेछ ।