काठमाडौं – प्रधानमन्त्री केपी शर्मा ओलीको स्वास्थ्य अवस्था सामान्य रहेको उहाँको सचिवालयले जनाएको छ । 

प्रधानमन्त्री ओलीको स्वास्थ्य अवस्था सामान्य नै रहेकाले आइतबार दिउँसो मन्त्रीपरिषदको बैठक बस्न लागेको उहाँका प्रेस सल्लाहकार कुन्दन अर्यालले जानकारी दिनुभयो । 

उहाँका अनुसार प्रधानमन्त्री ओलीलाई सामान्य रुघाखोकी मात्र लागेको हो । आफ्नै पार्टीले शनिबार आयोजना गरेको चियापान कार्यक्रममा प्रधानमन्त्री सहभागी नभएपछि उहाँको स्वास्थ्य अवस्थाबारे चासो बढेको छ । 

तर मृगौला पत्यारोपण गरेका कारण सामान्य रुघाखोकी लागेका बेला पनि भिडभाडमा निस्कनु स्वास्थ्यको लागि हानिकारक हुनसक्नै भन्दै शनिबारको कार्यक्रममा प्रधानमन्त्री ओली सहभागी नभएको अर्यालले दाबी गर्नुभयो । चिकित्सकले उहाँलाई आराम गर्न सल्लाह दिएको सल्लाहकार अर्यालले बताउनुभयो ।