काठमाडौं – प्रधानमन्त्री के.पी. शर्मा ओलीको स्वास्थ्यस्थितिलाई मध्यनजर गर्दै शिक्षण अस्पतालले प्रधानमन्त्रीसँगको भेटघाटमा रोक लगाएको छ । 

धेरै व्यक्तिसँगको सम्पर्कले संक्रमण बढन सक्ने बताउँदै अस्पतालले उहाँसँगको भेटघाटमा रोक लगाएको हो । मंगलबार दिउँसो अस्पतालले एक विज्ञप्ति सार्वजनिक गर्दै प्रधानमन्त्रीलाई स्वास्थ्यलाभ गराउन आफूहरुको पहिलो प्राथमिकता रहेको बताएको छ । विज्ञप्तिमा भनिएको छ,– ‘सम्माननीयज्यूको शीघ्र स्वास्थ्यलाभ गराउनु अस्पतालको पहिलो प्राथमिकता भएकोले चिकित्सकीय रायअनुसार भेटघाटलाई प्रतिबन्ध गरिएको व्योहोरा सम्बन्धित सबैमा अनुरोध गर्दछौँ ।’

प्रधानमन्त्री ओली कात्तिक १२ गतेदेखि शिक्षण अस्पतालमा उपचाररत हुनुहुन्छ ।

यस्तो छ अस्पतालले जारी गरेको विज्ञप्ति 

त्यस्तै प्रधानमन्त्रीका प्रेस सल्लाहकार डा. कुन्दन अर्यालले प्रेस नोट सार्वजनिक गरी प्रधानमन्त्री केप शर्मा ओलीको स्वास्थ्य अवस्थाका बारेमा जानकारी गराउनुभएको छ । अर्यालले जारी गरेको नोटमा प्रधानमन्त्री ओलीले देशभित्र र बाहिरबाट आफ्नो स्वास्थ्य अवस्थाबारे चिन्ता र चासो व्यक्त गर्नुहुने सम्पूर्ण नेपाली दिदीभाइ–दाजुबहिनी तथा विदेशी मित्रहरुप्रति आभार प्रकट गरेको उल्लेख छ ।

साथै अर्यालले प्रधानमन्त्रीको स्वास्थ्य क्रमिक सुधार भएको समेत जानकारी गराउँदै अस्पतालले समय समयमा जारी गर्ने विज्ञप्तिहरुबाट आधिकारिक जानकारी पाउन सकिने जनाउनुभएको छ ।

अर्यालले जारी गर्नुभएको प्रेस नोट