भारतले आज ७७ औँ स्वतन्त्रता दिवस मनाएको छ । सन् १९४७ अगस्ट १५ मा भारत बेलायतबाट स्वतन्त्र भएको थियो । भारतले हरेक वर्ष अगस्ट १५ तारिखमा स्वतन्त्रता दिवस मनाउने गर्छ । 

दिवसको अवसरमा दिल्लीमा रहेकाे लाल किल्लामा भएको कार्यक्रमलाई भारतका प्रधानमन्त्री नरेन्द्र मोदीले सम्बोधन गर्नुभएको छ । उहाँले हिंसाग्रस्त मणिपुर राज्यमा शान्ति कायम गर्ने प्रयासमा आफ्नो सरकार रहेको बताउनुभएको बीबीसी हिन्दीले जनाएको छ । हिंसा फैलिँदा मणिपुरबारे नबोलेको भन्दै आलोचना खेप्दै आउनुभएका मोदीले आफ्नो भाषणको शुरुमै मणिपुरको कुरा गर्नुभएको हो ।

मणिपुरमा गएकाे मे महिनामा मैतेई र कुकी समुदायबीच हिंसा शुरु भएको थियो । त्यसयता अहिलेसम्म एक सय ४० जनाको ज्यान गइसकेको छ भने हजारौँ मानिस विस्थापित भएका छन् । मणिपुरकै विषयलाई लिएर विपक्षी दलहरूले देशको सङ्घीय संसद्‌मा माेदीविरुद्ध अविश्वासको प्रस्ताव ल्याएका थिए । तर गएकाे हप्ता त्याे प्रस्ताव अस्वीकृत भएकाे थियाे ।

यस्तै प्रधानमन्त्री मोदीले भारतको अर्थतन्त्र अहिले विश्वमा शीर्ष पाँचौँ स्थानमा रहेको भन्दै आउँदो पाँच वर्षमा भारतलाई तेस्रो स्थानमा पुर्‍याउने घोषणा गर्नुभयो ।