गुल्मी - गुल्मीमा पहिरोका कारण कालीगण्डकी करिडोर अवरुद्ध भएकाे छ । 

कालीगण्डकी करिडोर अन्तर्गत रिडी‐रुद्रवेणी सडक खण्डमा  ठूलो पहिरो खसेपछि गएरातिदेखि गाडी आवतजावत दुईतर्फी नै बन्द भएकाे जिल्ला प्रहरी कार्यालय गुल्मीले जनाएको छ । 

रुरुक्षेत्र गाउँपालिका-१ अन्तर्गत रिडी बजार नजिकै रहेको विष्णुपञ्जरमा गएराति सडक माथिबाट ठूलो चट्टानसहितको पहिरो खसेको हो । इलाका प्रहरी कार्यालय रिडीबाट खटिएकाे प्रहरी टाेलीले बिहानैदेखि पहिराे पन्छाउने काम गरिरहेकाे छ। 

रिडी‐रुद्रवेणी‐वामीटक्सार हुँदै बाग्लुङ जिल्लाको बुर्तीवाङसम्म पुग्ने सडक बन्द हुँदा गाडी बीच बाटाेमै राेकिएका छन् । यस्तै, पाल्पा बुटवल लगायत जिल्लाका लागि छुटेका गाडी गएरातिदेखि राेकिँदा यात्रु समस्यामा परेका छन् । 

सडक सञ्चालनका लागि प्रयास भइरहेकाे  प्रमुख जिल्ला अधिकारी टेकबहादुर केसीले जानकारी दिनुभएकाे छ ।