काठमाडौं – प्रधानमन्त्री केपी शर्मा ओलीले वामपन्थी नेता तथा पूर्वमन्त्री पद्मरत्न तुलाधरको निधनमा शोक व्यक्त गर्नुभएको छ ।

प्रधानमन्त्रीले तुलाधार पत्नी नीलशोभा तुलाधरलाई आइतबार शोक सन्देश पठाउ“दै कठीन परिस्थितिदेखिका आफ्ना मित्रको निधनले मर्माहत भएको जनाउनुभएको छ । प्रधानमन्त्रीले तानाशाहीविरुद्धको संघर्षका क्रममा तुलाधरसँग बिताएका क्षणहरुको समेत स्मरण गर्नुभएको छ ।

‘उहाँले विभिन्न संघर्षमा निर्भिकतापूर्वक देश, नागरिक र लोकतन्त्रका पक्षमा गरेका अनवरत योगदान मेरो स्मृतिमा आइरहेका छन् । तिनलाई म अत्यन्त आदरपूर्वक स्मरण गरिरहेको छु,’ शोक सन्देशमा भनिएको छ, ‘श्री पद्मरत्न तुलाधर एक देशभक्त, लोकतन्त्रवादी, सामाजिक न्याय तथा समानताका पक्षधर र देशमा शान्ति एवं समृद्धि प्राप्तिको संघर्षका अथक अगुवा र वास्तविक जनपक्षीय व्यक्ति हुनुहुन्छ ।’

प्रधानमन्त्रीले शान्ति र मानवअधिकारका अभियन्ताको रुपमा समेत स्थापित तुलाधरको निधनले देश र मानवअधिकारको आन्दोलनमा गम्भीर क्षति पुगेको जनाउनुभएको छ । प्रधानमन्त्रीले तुलाधरप्रति श्रद्धाञ्जली अर्पण गर्दै शोकाकूल परिवारजनमा समवेदना प्रकट गर्नुभएको छ ।

तुलाधारको ७८ वर्षको उमेरमा आइतबार काठमाडौंको नर्भिक अस्पतालमा निधन भएको थियो ।