कैलाली - कैलालीमा निर्माणाधीन हुलाकी राजमार्ग स्तरोन्नति गर्ने काम थपिएको समयमा पनि पूरा हुन सकेको छैन । पहिलो सम्झौता अनुसारको समय अघिल्लो वर्ष पुस महिनामा सकिएर फेरि एक वर्षका लागि थपिएको म्याद पनि गएको पुस मसान्तमै सकिएको छ । म्याद थपिएको एक वर्ष बितिसक्दा पनि सडक निर्माण सकिएको छैन । हुलाकी राजमार्गअन्तर्गत दुईवटा सडक स्तरोन्नतिको काम भइरहेको छ ।

उत्तर–दक्षिण लम्की–खक्रौला सडक र पूर्वपश्चिम धनगढी–सत्ती सडकको स्तरोन्नतिको काम भइरहेको हो । लम्की–खक्रौला सडकको पहिलो खण्ड लम्कीबाट आठ किलोमिटरमात्र कालोपत्र भएको छ । बाँकी दुई खण्डको कालोपत्र गर्ने शुरु नै भएको छैन । अझै लम्की–खक्रौला सडकखण्डको २१ दशमलव सात किलोमिटर सडक कालोपत्र गर्न बाँकी छ । लम्की–खक्रौला सडकको अहिलेसम्मको प्रगति हेर्दा वित्तीयरूपमा ५४ प्रतिशत र भौतिकरूपमा ६० प्रतिशतमात्र पुगेको हुलाकी राजमार्ग निर्देशनालय धनगढीका सूचना अधिकारी बर्खबहादुर कठायतले बताउनुभयो।

त्यस्तै सत्ती–धनगढी खण्डको पहिलो खण्ड धनगढी क्याम्पसचोकबाट सात किलोमिटर र त्यसपछि दोस्रो खण्डको पाँच किलोमिटर सडकमात्र अहिलेसम्म कालोपत्र भएर सकिएको छ ।अन्य दुई खण्ड कालोपत्रको काम शुरु भएको छैन । सत्ती–धनगढी खण्डको ३१ दशमलव ५० किलोमिटर कालोपत्र गर्न बाँकी छ । यो प्रगति वित्तीय तथा भौतिकरूपमा झण्डै ६८ प्रतिशत पुगेको सूचना अधिकारी कठायतको भनाइ छ ।

लम्की–खक्रौला सडक तीन खण्ड निर्माण कम्पनी रायमाझी गल्वा जगदम्वा जेभीले र सत्ती–धनगढी सडक खण्डको काम स्वच्छन्द जोशी जेभीले गरिरहेको छ । यी सडक निर्माण सम्पन्न भएमा त्यहाँका नागरिकलाई धनगढी, टीकापुरलगायतका क्षेत्रमा यात्रा गर्न सहज हुनेछ । काम सक्न ढिलो हुँदा स्थानीयलाई दैनिक ओहोरदोहोर गर्न समस्या भएको बताएका छन् ।