विश्व रेडियो दिवसको अवसरमा रेडियो परासीद्वारा ट्राफिक सचेतना

नवलपरासी – विश्व रेडियो दिवसको अवसरमा पश्चिम नवलपरासीको सामुदायिक रेडियो परासी ९०.२ मेगाहर्जले गाडी दुर्घटना न्यूनिकरणका लागि ट्राफिक सचेतना कार्यक्रम सञ्चालन गरेको छ । दिवसको अवसरमा जिल्ला ट्राफिक कार्यालय र स्वास्थ्य कार्यालय नवलपरासीको सहकार्यमा आज सचेतना कार्यक्रम गरेको हो ।

जिल्ला स्वास्थ्य कार्यालयका प्रमुख भेषराज शर्माको अध्यक्षता र रामग्राम नगरपालिकाका मेयर धनपत यादवको प्रमुख आतिथ्यमा भएको कार्यक्रममा मेयर यादवले नगरभित्र ट्राफिक व्यवस्थापन गर्न सबै पक्षसँग सहकार्य गरेको बताउनुभयो ।

कार्यक्रममा सामुदायिक रेडियो परासीका अध्यक्ष राजकुमार रेश्मीले रेडियोले सामाजिक उत्तरदायित्व निर्वाह गर्दै सचेतना जागृत गरेको बताउनुभयो । कार्यक्रममा ट्राफिक सचेतनाका झन्डै दुई हजार वटा स्टिकर वितरण गरिएको छ ।