नाडा अटो शोको मुख्य आकर्षण, हिँडिरहेको रोबोटसँग हात मिलाउने

काठमाण्डौ – काठमाण्डौको भृकुटीमण्डपमा ‘नाडा अटो शो–२०२६’ को पहिलो दिन ३० हजारभन्दा बढी अवलोकनकर्ता पुगेका छन् ।

अवलोकनमा पुगेकामध्ये धेरैले अटो शोमा आकर्षणका रूपमा रहेको हिँडिरहेका रोबोटसँग हात मिलाउने र तस्बिर खिच्नेको भीड लागेको थियो । हिजो पहिलो दिन दुईपांग्रेदेखि चारपांग्रे गरी ५६ मोडलका गाडी सार्वजनिक गरिएको नाडा अटोमोबाइल्स एसोसिएसन अफ नेपालले जनाएको छ ।

अटो शोमा चारपांग्रे २६, मोटरसाइकल–स्कुटर १८ र कमर्सियल भेहिकलका १२ मोडलसहित १ सय ५० भन्दा बढी ब्रान्ड सहभागी छन् । भदौ १४ आइतबारसम्म चल्ने शोमा २ सय वटा स्टल राखिएको छ । शोमा यात्रु बस, माइक्रो बस, पिकअप भ्यान, कार, मोटरसाइकल र स्कुटर प्रत्यक्ष रूपमा हेरेर ग्राहकले छुट अफरमा किन्न सक्नेछन् ।

साथै हेलमेट, टायर, लुब्रिकेन्ट्सजस्ता सामग्री पनि नाडामा राखिएको आयोजकले जनाएको छ । विद्युतीय गाडी चार्जिङ स्टेसन डेमोका रूपमा राखिएको छ । सिप्रदीले नेपालमै तयार पारेको विद्युतीय स्कुटर ‘यात्री पीटू’ अटो शोको आकर्षण बनेको छ । जी–१ ह्युमनोइड रोबोट र गो–२ क्वाड्रुपेड रोबोटले अटो शोमा आकर्षण थपेको छ ।

हिजो पहिलो दिन सीजी एमएडब्लू इभोलुसन प्रालिले अवतार ०७, एलआरआर मोटर्सले चिनियाँ विद्युतीय कार बीई ११ मोडल, टाटाको नयाँ प्रिमियम एसयूभी ‘सिएरा ईभी’, डोङफेङका दुई मोडल इपाई ००७ र एमहिरो १, एमभी दुगड ग्रुप र रिभोल्ट मोटर्सले इलेक्ट्रिक बाइक ‘अल–न्यु आरभीएक्स’ सार्वजनिक गरेका छन् ।