नाडा अटो शो २०२६ सम्पन्न

काठमाण्डौ – १८ औँ नाडा अटो शो २०२६ हिजो सम्पन्न भएको छ । काठमाण्डौको भृकुटीमण्डपमा भदौ गएको ९ गतेदेखि शुरु भएको प्रदर्शनी हिजो सम्पन्न भएको हो । नाडा अटोमोबाइल्स एसोसिएसन अफ नेपाल (नाडा) को आयोजनामा भएको ६ दिने प्रदर्शनीमा दुई तथा चारपाङ्ग्रे गाडी, विद्युतीय गाडी, अटो पाट्र्स, टायर, लुब्रिकेन्ट्स, वित्तीय सेवा तथा अन्य अटोमोबाइलसम्बन्धी सामग्री प्रदर्शन गरिएको थियो ।

यस वर्षको नाडा अटो शोमा १५० भन्दा बढी ब्रान्ड र २०० भन्दा बढी स्टल सहभागी थिए । हुन्डाई, टाटा, बीवाईडी, डीपल, लिपमोटर, बीएआईसी, हङ्ची, अवतार, आयोन, चाङ्गान, चेरी, जीलीलगायतका ब्रान्डले नयाँ तथा आकर्षक मोडल सार्वजनिक तथा प्रदर्शन गरेका छन् । यस्तै, यामाहा, रोयल इन्फिल्ड र होन्डालगायतका मोटरसाइकल ब्रान्ड पनि सहभागी थिए ।

प्रदर्शनीमा यसपटक विद्युतीय गाडी मुख्य आकर्षण बने । नाडाका अनुसार अटो शोले नेपालको अटोमोबाइल तथा मोबिलिटी क्षेत्रको प्रविधि, व्यवसाय र सम्भावनालाई एउटै स्थानमा प्रस्तुत गर्ने महत्वपूर्ण मञ्चका रूपमा काम गरेको छ । पछिल्लो सयम अटोमोबाइल उद्योग रोजगारी र आर्थिक गतिविधिसँग जोडेर अघि बढिरहेको छ ।

नाडा अटो शो सुरु भएको दोस्रो दिन रसुवाको भोटेकोशी क्षेत्रमा आएको विनाशकारी बाढी तथा त्यसबाट सिर्जित विपद्का कारण व्यापारिक वातावरण प्रभावित भए पनि प्रदर्शनी निर्धारित समयमै सम्पन्न भएको आयोजकले जनाएको छ ।