भारतमा १८ दिनदेखि अनशनरत पर्यावरण अभियन्ता वाङचुकको स्वास्थ्य अवस्था बिग्रिँदै

भारतको दिल्ली उच्च अदालतले शिक्षाविद् तथा पर्यावरण अभियन्ता सोनम वाङचुकको अनशनका सम्बन्धमा केन्द्र सरकारसँग जवाफ मागेको छ ।

वाङचुकले दायर गर्नुभएको ‘पीआईएल’ अर्थात् सार्वजनिक हक वा सरोकार मुद्दाको सम्बन्धमा अदालतले आज केन्द्र र दिल्ली सरकारबाट जवाफ मागेको हो । ‘पीआईएल’ मा वाङचुकले जीवन बचाउन तत्काल सरकारी हस्तक्षेपको माग गर्नुभएको बीबीसीले जनाएको छ ।

कानूनी समाचार र विश्लेषण समेट्ने वेबसाइट ‘बार एन्ड बेन्च’ का अनुसार सामाजिक अभियन्ता तथा अधिवक्ता राकेश कुमार सैनीले ‘पीआईएल’ दायर गर्नुभएको हो । विषयको गम्भीरता र तत्काल सुनुवाइको आवश्यकतालाई मध्यनजर गर्दै अदालतले भोलि यो निवेदनमाथि सुनुवाइ गर्ने जनाएको छ ।

विभिन्न परीक्षामा भएको अनियमितता प्रकरणमा शिक्षामन्त्री धर्मेन्द्र प्रधानलाई राजीनामा दिन दबाव दिँदै सोनम वाङचुक १८ दिनदेखि अनशनमा हुनुहुन्छ । उहाँको स्वास्थ्य अवस्था बिग्रिँदै गएको छ र अनशन शुरू भएपछि तौल ८.४ किलोग्रामभन्दा धेरै घटिसकेको छ । यस्तै उहाँको रक्तचाप पनि घट्दै गएको छ ।

दिल्लीकाे जन्तर मन्तरमा ‘ककरोच जनता पार्टी’ (सीजेपी) द्वारा आयोजित विरोध प्रदर्शनमा सहभागी हुनुभएका अभियन्ता वाङचुक त्यसयता निरन्तर अनशनमा हुनुहुन्छ ।