गाजामा पहिलो पटक काठबाट बनेको विद्यालय सञ्चालनमा

अक्टोबर २०२३ मा युद्ध सुरु भएपछि शिक्षाबाट वञ्चित बनेका गाजाका बालबालिकाका लागि पहिलो पटक काठबाट निर्माण गरिएको विद्यालय सञ्चालनमा आएको छ ।

गाजा सिटीमा स्थापना गरिएको ’फ्रेन्ड्स अफ प्यालेस्टाइन’ विद्यालयले युद्धले प्रभावित बालबालिकालाई पुनः औपचारिक शिक्षामा फर्काउने प्रयास गरेको हो ।

चिनियाँ समाचार संस्था सिन्ह्वाका अनुसार युद्धका कारण ध्वस्त भएका विद्यालय भवन र विस्थापित परिवारका लागि आश्रयस्थलमा परिणत भएका शैक्षिक संस्थाको विकल्पस्वरूप काठका सामग्री प्रयोग गरेर कक्षाकोठा, डेस्क र बेन्च निर्माण गरिएको छ ।

यसअघि कतिपय स्थानमा पालभित्र अस्थायी सिकाइ केन्द्र सञ्चालन भए पनि आवश्यक शैक्षिक पूर्वाधारको अभाव रहेको थियो । हाल विद्यालयमा झण्डै ८५० जना विद्यार्थी अध्ययनरत छन् ।

निर्माण सामग्रीको चरम अभावका बीच निजी चन्दाको सहयोगमा वेफाक ह्युमानिटेरियन फाउण्डेसन ले विद्यालय निर्माण गरेको हो । बढीभन्दा बढी विद्यार्थीलाई समेट्न विद्यालयले तीन सिफ्टमा कक्षा सञ्चालन गरिरहेको छ ।

गाजाको सञ्चार कार्यालयका अनुसार युद्ध सुरु भएयता गाजाका सबै विद्यालय पूर्ण वा आंशिक रूपमा क्षतिग्रस्त भएका छन् । यसका कारण ६ लाख २० हजारभन्दा बढी विद्यार्थी नियमित शिक्षाबाट वञ्चित भएका छन् भने २० हजारभन्दा बढी विद्यार्थीले ज्यान गुमाइसकेका छन् ।