दक्षिणपूर्व एशियाका ‘स्क्यामिङ सेन्टर’ मा बन्धक बनाइएका ८६० नेपालीको उद्धार

काठमाण्डाै – दक्षिण–पूर्व एशियाली देशका अनलाइन ‘स्क्यामिङ सेन्टर’ मा बन्धक बनाइएका ८६० जना नेपालीको उद्धार भएको छ ।

परराष्ट्र मन्त्रालयका अनुसार कम्बोडिया, म्यानमार, लाओस र थाइल्यान्डको सीमा क्षेत्रमा सञ्चालित अवैध सेन्टरबाट उनीहरूको उद्धार भएको हो । मन्त्रालयमा आयोजित नियमित पत्रकार सम्मेलनमा आज प्रवक्ता लोकबहादुर पौडेल क्षेत्रीले कम्बाेडियाबाट ७३३, म्यानमारबाट ११३, लाओसबाट ८ र थाइल्यान्डबाट ६ जनाकाे उद्धार भएकाे जानकारी दिनुभयो ।

उहाँका अनुसार कम्बोडियामा अझै ४९ जना नेपाली विभिन्न अभियोगमा जेलमा रहेका छन् । उनीहरूलाई आवश्यक कानूनी सहायता उपलब्ध गराउन थाइल्यान्डकाे बैंककमा रहेकाे नेपाली राजदूतावासमार्फत समन्वय भइरहेको मन्त्रालयले जनाएको छ ।

स्क्यामिङ सेन्टरमा नेपाली पठाउने गैरकानूनी कार्यमा संलग्न व्यक्तिको यथार्थ विवरणसहित कारबाहीका लागि परिवार र आफन्तले नेपाल प्रहरीलगायतका निकायमा निवेदन दिनुपर्ने, विदेशमा रहेका तर फर्कन अनिच्छुक नेपालीलाई सामाजिक सञ्जाल वा अन्य माध्यमबाट सम्पर्क गरी परिवारले स्वदेश फर्कन प्रेरित गर्नुपर्ने, राजदूतावासले जरिवाना छुट गराइसकेका व्यक्तिलाई तुरुन्त फर्कन पनि क्षेत्रीले आग्रह गर्नुभएको छ ।