जापानी नागरिकको जनसङ्ख्या ४२ वर्षमा पहिलो पटक १२ करोडभन्दा तल झर्‍याे

जापानमा जापानी नागरिकको जनसङ्ख्या ४२ वर्षमा पहिलो पटक १२ करोडभन्दा तल झरेको छ । यस वर्षको जनवरी १ सम्ममा जापानी नागरिकको जनसङ्ख्या ११ करोड ९७ लाख ३६ हजार ४८३ कायम भएको आज सार्वजनिक भएको सरकारी तथ्याङ्कलाई उद्धृत गर्दै चिनियाँ समाचार संस्था सिन्ह्वाले जनाएको छ ।

आन्तरिक मामिला तथा सञ्चार मन्त्रालयको तथ्याङ्कअनुसार यो सङ्ख्या अघिल्लो वर्षको तुलनामा ९ लाख १७ हजारले घटेको छ । सन् १९६८ मा तुलनायोग्य तथ्याङ्क उपलब्ध हुन थालेयता यो सबैभन्दा ठूलो गिरावट हो ।

जापानका ४७ प्रशासनिक क्षेत्रहरूमध्ये टोकियोमा मात्र जापानी नागरिकको सङ्ख्या ०.०९ प्रतिशतले वृद्धि भएको तथ्याङ्कले देखाएको छ ।

यसैबीच विदेशी बासिन्दाहरूको सङ्ख्या भने ३ लाख ५४ हजारले बढेर ४० लाख ३१ हजार १ सय ५९ पुगेको छ । यो सङ्ख्या सन् २०१३ मा मन्त्रालयले तथ्याङ्क सङ्कलन गर्न थालेयता सबैभन्दा धेरै रहेको खबरमा उल्लेख छ ।

जापानको कुल जनसङ्ख्या (विदेशी बासिन्दाहरूसमेत गरी) १२ करोड ३७ लाख ६७ हजार ६४२ पुगेको छ । यो सङ्ख्या अघिल्लो वर्षको तुलनामा झन्डै ५ लाख ६३ हजारले कम हो । टोकियो, चिबा र ओसाका प्रशासनिक क्षेत्रहरूमा मात्र जनसङ्ख्या वृद्धि देखिएको थियो ।