युक्रेनका एक बालकमा मुटु प्रत्यारोपण

युक्रेनमा एक बालकमा सफलतापूर्वक मुटु प्रत्यारोपण भएको छ ।

रुसी आक्रमणका क्रममा गम्भीर घाइते भएकी ४ वर्षीया बालिकाको उपचारकै क्रममा ब्रेन डेथ भएपछि उनका परिवारले अंगदान गर्ने साहसी निर्णय गरेको बीबीसीको खबरमा उल्लेख छ । त्यसपछि चिकित्सकहरूले ती बालिकाको मुटुलाई जन्मजात मुटुरोगबाट पीडित एक बालकमा सफलतापूर्वक प्रत्यारोपण गरेका हुन् ।

सफल शल्यक्रियासँगै बालकले नयाँ जीवन पाएका छन् । मुटु प्रत्यारोपण गरिएका १२ वर्षीय बालक विगत तीन वर्षदेखि रगतको क्यान्सर, कडा खालको निमोनियाको समस्याबाट समेत पीडित थिए । साथै, ती ब्रेनडेथ भएकी बालिकाका अन्य अंगहरू पनि आवश्यक परेका अरू बिरामीमा प्रत्यारोपण गरिएको थियो ।

ब्रेनडेथ भएकी बालिकाको मुटु जीवित नै राख्ने एकमात्र उपाय मुटु प्रत्यारोपण भएको निष्कर्षमा चिकित्सकहरू पुगेका खबरमा उल्लेख छ । प्रत्यारोपण सफल भएपछि अस्पतालमा पुगेकी ती आमालाई चिकित्सकहरूले विशेष प्रविधि स्टेथोस्कोपमार्फत आफ्नी छोरीको मुटुको धड्कन बालकको छातीभित्र सुन्ने अवसर दिएका थिए ।

चिकित्सकहरूका अनुसार युद्धको कठिन परिस्थितिमा गरिएको यो मुटु प्रत्यारोपण निकै चुनौतीपूर्ण थियो । यो घटनाले अंगदानले मृत्युपछि पनि अर्को जीवन बचाउन सक्ने सन्देश दिएको भन्दै युक्रेनमा यसको प्रशंसा भइरहेको छ ।