ग्यास आपूर्ति सहज बनाउन नेपाल आयल निगमको निर्देशन

काठमाण्डौ — नेपाल आयल निगमले एलपीजी ग्यास आपूर्ति सहज बनाउन ग्यास वितरकलाई निर्देशन दिएको छ ।

निगमले आज विज्ञप्ती निकालेर बजारमा १४ दशमलव २ किलो क्षमताको एलपी ग्यासको अभाव नरहेको स्पष्ट पार्दै आपूर्ति सहज बनाउन वितरकलाई निर्देशन दिएको हो । यस्तै निगमले उपभोक्तालाई पनि आवश्यकता अनुसार मात्रै ग्यास खरिद गर्न र अनावश्यक मौज्दात नगर्न आग्रह गरेको छ । निगमले असार ३१ गतेको निर्णयअनुसार १४ दशमलव २ किलो ग्यास सिलिन्डरको बिक्री–वितरण व्यवस्था मिलाइएको र दैनिक मागअनुसार ग्यास आपूर्ति भइरहेको जनाएको छ ।

बजारमा ग्यास अभाव भएको समाचार प्रकाशित भएपछि निगमले त्यसप्रति गम्भीर ध्यानाकर्षण भएको पनि उल्लेख गरेको छ । निगमले घरायसी प्रयोजनका उपभोक्तालाई प्राथमिकता दिदै खरिदकर्ताको नाम, ठेगाना र सम्पर्क नम्बरको अभिलेख राखेर व्यवस्थित रूपमा बिक्री–वितरण गर्न विक्रेतालाई आग्रह गरिएको छ ।

निगमले ग्यास नपाएको अवस्थामा कार्यालय समयभित्र आफ्नो हटलाइन नम्बर ०१–५४१९१०२ मा खबर गर्न पनि उपभोक्तालाई अनुरोध गरेको छ । निगमले एलपी ग्यासको आयात तथा बिक्री–वितरण नियमित रहेको र आउँदा दिनमा पनि निरन्तर रहने जनाउँदै आवश्यकता अनुसार मात्रै ग्यास खरिद गर्न तथा अनावश्यक भण्डारण नगर्न उपभोक्तासँग आग्रह गरेको छ ।