अत्यधिक गर्मीका कारण हङ्गेरीको आणविक ऊर्जा केन्द्र बन्द हुने

ड्यान्युब नदीको पानीको सतह कीर्तिमानीरूपमा घटेपछि हङ्गेरीले ४४ वर्षपछि पहिलो पटक आफ्नो एकमात्र आणविक ऊर्जा केन्द्र बन्द गर्ने भएको छ ।

युरोपभर लामो समयदेखि चलिरहेको खडेरी र अत्यधिक गर्मीका कारण उत्पन्न ऊर्जा सङ्कटको पछिल्लो प्रभावका रूपमा हङ्गेरीले पाक्स आणविक ऊर्जा केन्द्र बन्द गर्ने निर्णय गरेको समाचार संस्था एएफपीले जनाएको छ ।

बुडापेस्टको दक्षिणमा रहेको यो केन्द्रले सामान्य अवस्थामा हङ्गेरीको झन्डै एकतिहाइ विद्युत् माग पूरा गर्दै आएको छ । केन्द्रका उपकरण चिस्याउन ड्यान्युब नदीको पानी प्रयोग गरिन्छ । तर मे महिनादेखि वर्षाको कमी र निरन्तरको उच्च तापक्रमका कारण नदीको जलस्तर अत्यधिक घटेको छ ।

यसअघि केन्द्र सञ्चालकले पानीको सतह निरन्तर घटेमा आउँदो हप्ताको मध्यसम्ममा पाक्स केन्द्र पूर्णरूपमा बन्द गर्नुपर्ने अवस्था आउन सक्ने चेतावनी दिएका थिए ।

हङ्गेरीको राष्ट्रिय मौसम सेवा ‘हङ्गारोमेट’ ले आउँदा दिनमा तापक्रम ४० डिग्री सेल्सियसभन्दा माथि पुग्ने अनुमान गरेको छ । आउँदो बिहीवार तापक्रम ४२ डिग्री सेल्सियससम्म पुग्न सक्ने अनुमान छ, यो यस गर्मीयामको अहिलेसम्मकै उच्च तापक्रमसँग बराबर हुनेछ ।