हसिनाले नयाँ दिल्लीबाट सम्बोधन गर्न लागेकोबारे बङ्गलादेशले भारतसँग धारणा माग्यो

बङ्गलादेशले निर्वासनमा रहेकी पूर्वप्रधानमन्त्री शेख हसिनाले नयाँ दिल्लीबाट गर्न लागेको भर्चुअल सम्बोधनबारे भारतसँग आफ्नो धारणा स्पष्ट पार्न आग्रह गरेको छ ।

साथै बङ्गलादेशले भागेका व्यक्तिलाई राजनीतिक गतिविधि गर्न दिँदा सुधारोन्मुख द्विपक्षीय सम्बन्धमा असर पर्न सक्ने चेतावनी पनि दिएको समाचार संस्था रोयटर्सले जनाएको छ ।

नयाँ दिल्लीमा ‘फरेन करेस्पोन्डेन्ट्स क्लब अफ साउथ एशिया’ (एफसीसीएसए) ले आयोजना गर्ने अगस्ट ५ को कार्यक्रममा हसिनाको प्रस्तावित सहभागिताप्रति बङ्गलादेशको यो पहिलो आधिकारिक प्रतिक्रिया हो ।

एफसीसीएसएले जनाएअनुसार ७८ वर्षीया हसिनाले आफ्ना छोरा सजिब वाजेद जोय र अन्य वक्ताहरूसँगै भिडियो लिङ्कमार्फत नयाँ दिल्लीको कार्यक्रमलाई सम्बोधन गर्ने कार्यक्रम छ ।

सन् २०२४ अगस्टमा विद्यार्थी–नेतृत्वको आन्दोलनका कारण बङ्गलादेशबाट भागेपछि भारतमा बस्दै आएकी हसिनालाई भारतबाट सुपुर्दगी गराउन बङ्गलादेशले प्रयास गरिरहेका बेला यो विषय चर्चामा आएको हो । आफूविरुद्ध विभिन्न मुद्दाहरू दर्ता भए पनि हसिनाले आउँदो डिसेम्बरमा बङ्गलादेश फर्कने योजना रहेको बताउनुभएको छ ।

बङ्गलादेशकी विदेश मामिला राज्यमन्त्री शामा ओबेद इस्लामले भारतसँग भविष्यमुखी दृष्टिकोणका साथ अघि बढिरहेकोले हसिनाको सम्बोधनबारे भारतको धारणा स्पष्ट हुनुपर्ने बताउनुभएको खबरमा उल्लेख छ ।