कागजातविहीन र अलपत्र १५५ नेपाली श्रमिकको उद्धार गर्दै श्रम मन्त्रालय

काठमाण्डौ — युवा, श्रम तथा रोजगार मन्त्रालयले विभिन्न देशमा कागजातविहीन अवस्थामा रहेका तथा भिजिट भिसामा गएर अलपत्र परेका १५५ जना नेपाली नागरिकको उद्धार गर्ने भएको छ ।

प्रतिनिधिसभाको उद्योग तथा वाणिज्य, श्रम तथा उपभोक्ता हित समितिको हिजोको बैठकमा श्रम, रोजगार तथा सामाजिक सुरक्षामन्त्री रामजी यादवले राष्ट्रिय स्तरको कल्याणकारी कोषको सहयोगमा उद्धार प्रक्रिया अघि बढाइएको जानकारी दिनुभयो । उहाँका अनुसार उद्धारका लागि कोषमा रहेको १५ करोड रुपैयाँको बजेट प्रयोग गरिनेछ ।

बैठकमा मन्त्री यादवले वैदेशिक रोजगार, स्वदेशी श्रमिकको अवस्था, रोजगार सिर्जना तथा मन्त्रालयसँग सम्बन्धित विभिन्न कानुन संशोधनको अवस्थाबारे पनि जानकारी दिनुभयो । उहाँले चालु आर्थिक वर्षभित्र स्वदेशमै एक लाखलाई रोजगारी उपलब्ध गराउने लक्ष्य रहेको बताउँदै राष्ट्रिय रोजगार कार्यक्रमअन्तर्गत ‘ग्रिन जब मिसन’ सहित १२ वटा कार्ययोजना कार्यान्वयनमा ल्याइएको जानकारी दिनुभयो।

स्वदेशमै दिगो र सम्मानजनक रोजगारी सिर्जना मन्त्रालयको प्रमुख प्राथमिकता रहेको उहाँको भनाइ थियो । वैदेशिक रोजगारीमा जाने श्रमिकको स्वास्थ्य सेवा प्रभावकारी बनाउन मन्त्रालयले ‘मेडिसिटी’ सेवा आफ्नै व्यवस्थापनमा सञ्चालन गर्ने तयारीसमेत गरेको मन्त्री यादवले बताउनुभयो । यसअघि वीर अस्पतालका चिकित्सकमार्फत फोनका आधारमा दिइने स्वास्थ्य परामर्श अपेक्षाअनुसार प्रभावकारी हुन नसकेको उहाँले उल्लेख गर्नुभयो ।

मन्त्री यादवका अनुसार वैदेशिक रोजगार ऐनलाई समयानुकूल बनाउन संशोधन प्रक्रिया अघि बढाइएको छ । साथै ‘फ्रि भिसा, फ्रि टिकट’को नाममा हुने ठगी नियन्त्रणका लागि कार्यदल गठन गरिएको र आवश्यक कानुनी तथा नीतिगत सुधारको तयारी भइरहेको उहाँले जानकारी दिनुभयो ।