दलित समुदायका थर सूचीकरण गर्नुअघि मन्त्रालयद्वारा सुझाव माग

काठमाण्डौ — सरकारले दलित समुदायका थर सूचीकरण गर्नुअघि सरोकारवाला र आम नागरिकसँग राय–सुझाव माग गरेको छ ।

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयले राष्ट्रिय दलित आयोगबाट सिफारिस भई आएका थरहरूको सूची सार्वजनिक गर्दै सुझाव आह्वान गरेको हो ।

मन्त्री सीता बादीको निर्देशनमा मन्त्रिपरिषद्बाट अन्तिम निर्णय हुनुअघि थप स्पष्टताका लागि यो विवरण सार्वजनिक गरिएको मन्त्रालयले जनाएको छ । दलित समुदायका थर सूचीकरणसम्बन्धी विवरण मन्त्रालयको आधिकारिक वेबसाइटमा हेर्न सकिनेछ ।

यदि यस सूचीमा कुनै राय, सुझाव वा प्रतिक्रिया भए दुई दिनभित्र मन्त्रालयको आधिकारिक इमेल अथवा मन्त्री र उहाँको सचिवालयको इमेलमार्फत पठाउन सकिनेछ । प्राप्त सुझावहरूलाई आवश्यक अध्ययन गरी सूचीकरण प्रक्रियामा समेटिने मन्त्रालयले स्पष्ट पारेको छ ।