नेप्से स्थिर, ४ अर्ब रुपैयाँभन्दा धेरैकाे काराेबार

काठमाण्डाै – लगातार तेस्रो कारोबार दिन घटेको शेयर बजार आज स्थिर रहेको छ । हिजो २ हजार ६४१.०६ विन्दुमा रहेको शेयर बजार परिसूचक नेप्से आज २ हजार ६४१.८५ विन्दुमा पुगेर बन्द भएको छ ।

आज बैंक, होटल तथा पर्यटन, जलविद्युत्, लगानी, जीवन बीमा र अन्य बाहेक सबै समूहको उपसूचक घटेको छ । आज १३४ वटा कम्पनीको शेयर बढेकोमा १२१ वटाको घटेको छ । यस्तै २० वटा कम्पनीको शेयर भने घटबढ भएको छैन ।

आज अपर लोहोरे खोला हाइड्रोपावरको शेयर १५ प्रतिशतले बढेको छ । बजार स्थिर रहेको दिन मिथिला लघुवित्तको शेयर झन्डै १५ प्रतिशतले घटेको छ ।

आज नेप्से स्थिर रहे पनि कारोबार रकम भने बढेको छ । हिजो ३ अर्ब ६७ करोडको कारोबार भएकोमा आज ३४० वटा कम्पनीको ९५ लाख ३४ हजार कित्ता शेयर ४ अर्ब ११ करोड रुपैयाँमा किनबेच भएको छ ।