नुवाकोटमा रोकिराखेको बसले गुडेर भ्यानलाई ठक्कर दिँदा २ जनाको ज्यान गयो

काठमाण्डाै – नुवाकोटको थानाभञ्ज्याङमा बसले भ्यानलाई ठक्कर दिँदा २ जनाको ज्यान गएको छ । अरू ३ जना घाइते भएका छन् ।

शिवपुरी गाउँपालिका–७ थानाभञ्ज्याङकाे टोखा–छहरे सडक खण्डमा रोकेर राखेको बस आज बिहान ९ बजेतिर अचानक गुड्दा अगाडि रोकिराखेको भ्यानलाई ठक्कर दिएको हो । त्यसपछि दुवै गाडी सडकबाट तल खसेका जिल्ला प्रहरी कार्यालय नुवाकोटका सूचना अधिकारी एवम् प्रहरी नायब उपरीक्षक (डीएसपी) इकबाल हवारीले जानकारी दिनुभयो ।

दुर्घटनामा घाइते भएका ५ जनालाई उपचारका लागि काठमाण्डौ ल्याएकोमा २ जनालाई अस्पताल पुर्‍याउनासाथ डाक्टरले मृत घोषणा गरेका हुन् ।

ज्यान गुमाउनेहरूमा काभ्रेको बनेपा नगरपालिका–८ की ५४ वर्षीया कृष्णमाया प्रजापती डङ्गोल र रामेछापको खाँडादेवी गाउँपालिका–२ का ६५ वर्षीया उदयमाया खत्री रहेका छन् ।

यस्तै सर्लाहीको लालबन्दी नगरपालिका–९ घर भई काठमाण्डाै बस्ने २५ वर्षीया सुजता पोखरेल, बनेपा नगरपालिका–१० की ४२ वर्षीया सर्मिला श्रेष्ठ र दोलखाको मेलुङ गाउँपालिका–६ घर भई काठमाण्डाै बस्ने ६० वर्षीया ज्ञानु श्रेष्ठ घाइते रहेका छन् ।