इन्डोनेशियामा शक्तिशाली भूकम्प : कम्तीमा ३८ जनाको ज्यान गयाे

इन्डोनेशियामा आज बिहान गएको ७.७ म्याग्निच्युडको भूकम्पमा परेर कम्तीमा ३८ जनाको ज्यान गएको त्यहाँको विपद् व्यवस्थापन निकायले जनाएको छ ।

विपद् व्यवस्थापन निकाय ‘बीपीबीडी’ ले खोजी तथा उद्धार कार्य चलिरहेकाले अहिले प्राप्त विवरण प्रारम्भिक मात्र भएको बताएको छ । भूकम्प र त्यसपछि आएका दर्जनौँ परकम्पले यस क्षेत्रका भवनहरूमा क्षति पुर्‍याएका छन् ।

शुरूमा प्रशासनले सुनामीको चेतावनी जारी गरेको भए पनि भूकम्पको मुख्य धक्का महसुस भएको झन्डै ३ घण्टापछि त्यस्तो सूचना हटाएको बीबीसीले जनाएको छ ।

इन्डोनेशियाको स्थानीय समयअनुसार बिहान ५ बजेतिर फ्लोरेस टापुमा भूकम्प गएको थियो ।

विपद् व्यवस्थापन निकायका अनुसार झन्डै २ हजार मानिस आफैँ सुरक्षित ठाउँमा सरेका छन् । तर प्रभावित क्षेत्र दुर्गम र पहाडी भएकाले क्षतिको पूर्ण विवरण आउन केही समय लाग्ने खबरमा उल्लेख छ ।

बीएपीबीले मानिसहरूलाई संयमित रहन र तटीय क्षेत्रबाट टाढा बस्न सुझाव दिएको छ ।