बेल्जियममा कामदारले फेला पारे डेढ अर्ब रुपैयाँभन्दा धेरैको सुन

बेल्जियमको पूर्वी फ्ल्यान्डर्समा घर मर्मत गरिरहेका कामदारहरूले झन्डै ९० लाख युरो अर्थात् १ अर्ब ५८ करोड रुपैयाँभन्दा धेरै मूल्य बराबरको सुनका इँटा र सिक्काहरू फेला पारेका छन् ।

स्थानीय सञ्चारमाध्यमका अनुसार यसै हप्ताको शुरूमा ढलको पाइप बिछ्याउन खन्ने क्रममा कामदारहरूले यो खजाना फेला पारेका स्थानीय सञ्चारमाध्यमलाई उद्धृत गर्दै बीबीसीले जनाएकाे छ । यति ठूलाे परिमाणमा सुन भेटिएपछि कसले दाबी गर्न सक्छ भन्ने प्रश्न उठेकाे छ ।

कामदारहरूका साथै यो ठाउँको स्वामित्व अधिकार राख्ने स्थानीय निकायले पनि यसमा दाबी गर्ने सम्भावना छ ।

घटनाबारे अनुसन्धान शुरू गरेपछि प्रहरीले मानिसहरूलाई त्यो ठाउँमा गएर थप खजाना खोज्न रोक लगाएको छ । प्रहरीले घरको पूर्णरूपमा खोजतलास गरिसकेको र भेटिएको सबै सुन सुरक्षित ठाउँमा राखिएको जनाएको छ ।

सुन भेटिएको ठाउँ अहिले सीएडब्ल्यू ओस्ट–भ्लान्डेरेन नामक संस्थाको स्वामित्वमा छ । यो संस्थाले डेनडरमोन्डे क्षेत्रमा मानिसहरूलाई सामाजिक तथा कल्याणकारी सहायता उपलब्ध गराउँदै आएको छ ।

संस्थाका निर्देशक गीर्ट हिलर्टले भविष्यमा यो खजाना संस्थाको काममा प्रयोग गर्न सकिने र दैनिक रूपमा देखिने ठूलो आवश्यकतालाई सम्बोधन गर्न सहयोग पुग्ने आशा व्यक्त गर्नुभएको छ ।

बेल्जियमको कानूनअनुसार वास्तविक मालिकले यो खजाना आफ्नो भएको दाबी गर्न ५ वर्षको समय हुन्छ । यद्दपि यस घटनाको अनुसन्धान गरिरहेका स्थानीय सरकारी वकिलका अनुसार अहिलेसम्म यो सुनको वास्तविक मालिक को हुन् भन्ने पत्ता लागेको छैन ।

यदि ५ वर्षभित्र कसैले पनि दाबी गर्न नआएमा नागरिक कानूनअनुसार अरूको जमिनमा लुकाइएको खजाना फेला पार्ने व्यक्ति र त्यो जमिनको मालिकबीच बाँड्ने व्यवस्था छ । तर यो खजाना कुनै अपराधसँग सम्बन्धित नभएको प्रमाणित हुनुपर्नेछ ।