रास्वपा सांसद र मन्त्रीको कार्यशैलीप्रति सभापति लामिछानेको चासो, संयमित हुन निर्देशन

काठमाण्डाै – सत्तारूढ राष्ट्रिय स्वतन्त्र पार्टी (रास्वपा) ले आफ्ना मन्त्री तथा सांसदहरूको कार्यशैली र संसद‍्मा उनीहरूको प्रस्तुतिबारे आन्तरिक छलफल गरेको छ ।

सिंहदरबारमा रहेको संसदीय दलको कार्यालयमा आज पार्टी सभापति रवि लामिछानेको उपस्थितिमा छलफल भएको हो । बैठकमा सभापति लामिछानेले संसद‍्मा प्रस्तुत हुँदा सांसद र मन्त्रीहरूले अवलम्बन गर्ने व्यवहार र भाषाप्रति विशेष चासो व्यक्त गर्नुभएको छ ।

पछिल्लो समय संसद‍्मा प्रश्नोत्तरका क्रममा मन्त्रीहरूले सांसदहरूलाई चेतावनीपूर्ण शैलीमा जवाफ दिने गरेको र आफ्ना मागहरू सम्बोधन नहुँदा सांसदहरूले पनि अमर्यादित वा रुखो व्यवहार देखाउने गरेको भनी आलोचना भइरहेको सन्दर्भमा यो बैठक आयोजना भएको हो ।

छलफलका क्रममा नागरिकका मुद्दालाई संसद‍्मा कसरी प्रभावकारी र मर्यादित ढङ्गले प्रस्तुत गर्ने भन्ने विषयमा पनि छलफल भएको छ । संसद‍्मा पार्टीका तर्फबाट हुने प्रस्तुतिलाई थप जिम्मेवार र संयमित बनाउनुपर्नेमा सभापति लामिछानेले जोड दिनुभएको छ ।

रास्वपाका सांसदहरूले संसदीय समिति र संसद‍्मा असन्तुष्टि व्यक्त गर्दा शैलीगत सन्तुलन गुमाउने गरेको भनी बाहिर भइरहेको टिप्पणीलाई ध्यान दिएर पार्टीले आन्तरिक सुधारको प्रयास थालेको हो ।