गगन थापाको नेतृत्वमा हुने अधिवेशनमा सहभागी नहुन देउवा पक्षको अपिल

काठमाण्डौ — नेपाली कांग्रेसको शेरबहादुर देउवा पक्षले गगन थापा नेतृत्वको केन्द्रीय कार्यसमितिले १५ औँ महाधिवेशनका लागि गरिररहेका अधिवेशनहरुमा सहभागी नहुन नेता कार्यकर्तालाई अपिल गरेको छ ।

नेता डा. शशांक कोइरालाले हिजो विज्ञप्ति निकालेर यस्तो अपिल गर्नुभएको हो । संस्थापन इतर पक्षका नेताहरूको छलफलपछि डा. कोइरालाले निकालेको विज्ञप्तिमा कांग्रेसको आधिकारिकतासम्बन्धी विवाद विचाराधिन रहेको उल्लेख छ ।

सर्वोच्चमा मुद्दा विचाराधिन रहेको अवस्थामा महाधिवेशन अघि बढाए पार्टीका सबै तहमा संरचनागत विभाजन शुरु हुने चेतावनी पनि देउवा पक्षले दिएको छ ।

देउवा पक्षले अहिले कांग्रेसलाई सुदृढ, सबल र गतिशील बनाउन सांगठनिक तथा भावनात्मक एकता आवश्यक रहेको जनाएको छ । देउवा पक्षले विशेष महाधिवेशन पक्षले आयोजना गर्ने अधिवेशन तथा महाधिवेशनलाई ‘अवैधानिक र विभाजनकारी’ भन्दै त्यसमा सहभागी नहुन पार्टीका सबै तहका समिति, पदाधिकारी, सदस्य तथा क्रियाशील सदस्यलाई अपिल गरेको छ ।