काठमाण्डौका होस्टेल सञ्चालकलाई प्रशासनको २१ बुँदे निर्देशन

काठमाण्डाै – काठमाण्डाै जिल्ला प्रशासन कार्यालयले निजी छात्रावास अर्थात् होस्टेलहरूलाई व्यवस्थित र मर्यादित बनाउन एक महिने अल्टिमेटमसहित २१ बुँदे निर्देशन जारी गरेको छ ।

पछिल्लो समय होस्टेलमा विद्यार्थीमाथि अमानवीय व्यवहार हुने गरेको, तोकेभन्दा धेरै शुल्क लिएको, कमसल खाना दिएको र झडपमा ज्यानै जानेसम्मका गम्भीर गुनासा आएपछि प्रशासनले कडा कदम चालेको हो ।

गएको शुक्रवार मात्रै शङ्खमूलमा रहेकाे भ्याली ब्वाइज होस्टलमा २२ वर्षीय वसन्त कालाखेतीको हत्या भएको थियो । त्यो घटनालगत्तै प्रशासनले यो निर्देशन ल्याएको हो ।

नयाँ निर्देशनअनुसार अब होस्टेलभित्र लागूऔषध, जाँड–रक्सी र सुर्तीजन्य पदार्थमा पूर्ण प्रतिबन्ध लगाउनुपर्नेछ । कोठा र शौचालयबाहेकका ठाउँमा अनिवार्य सीसीटीभी जडान गर्नुपर्नेछ भने चौबीसै घण्टा जिम्मेवार वार्डेन र सुरक्षाकर्मी राख्नुपर्नेछ ।

त्यसैगरी महिला र पुरुषका लागि एउटै भवनमा होस्टेल सञ्चालन गर्न पाइने छैन । विद्यार्थीको विवरण नजिकको प्रहरीलाई बुझाउनुपर्नेछ भने स्वच्छ खानपान र उपयुक्त अध्ययन कक्षको व्यवस्था हुनैपर्नेछ ।

मापदण्ड विपरीत चलेका केही होस्टेललाई प्रशासनले ३ लाख रुपैयाँसम्म जरिवाना र सिलबन्दीसमेत गरिसकेको छ ।

एक महिनाभित्र सुधार नभए कानूनबमोजिम थप कडा कारबाही हुने चेतावनी प्रशासनले दिएको छ ।