विद्यार्थीले कपाल छोटो बनाउन नमान्दा चितवनका निजी बिद्यालय हैरान

काठमाण्डौ – विद्यालय र अभिभावकको ताकेताका बीच चितवनका किशोर–किशोरी तथा विद्यार्थीहरूमा लामो कपाल पाल्ने मोह बढेको छ ।

भरतपुरका अभिभावक विनोद ढकाल र बुद्धिकान्त न्यौपानेजस्तै धेरैजसो अभिभावक अहिले आफ्ना छोराहरूले कपाल छोटो बनाउनै नमान्दा चिन्तित बनेका छन् ।

विद्यालयहरूले पनि विद्यार्थीलाई कपाल काट्न दबाब दिन छाडेर अभिभावकको सहारा लिन थालेका छन् । विद्यालयले जबरजस्ती कपाल काट्न लगाएको भन्दै विद्यार्थीहरूले ’हेलो सरकार’ र प्रहरीमा समेत उजुरी दिन थालेपछि बिद्यालयले जवरजस्ती नगरेका हुन् ।

प्याब्सन चितवनका अध्यक्ष मदन पुरीका अनुसार देशभरका ३५ भन्दा बढी निजी विद्यालयविरुद्ध हेलो सरकारमा उजुरी परेको छ । शिक्षा नियमावलीको १० औँ संशोधनको नियम २५ अनुसार विद्यार्थीको इच्छाविपरीत कपाल काट्न वा उनीहरूलाई साजसज्जाका आधारमा होच्याउन पाइँदैन ।

मनोविज्ञानका उपप्राध्यापक डा.सुरेन्द्र घिमिरे इन्टरनेट र सामाजिक सञ्जालको सहज पहुँचका कारण सानै उमेरमा ’सेलिब्रेटी’हरूको सिको गर्ने र कपाल पाल्ने प्रवृत्ति बढेको बताउनुहुन्छ ।

विज्ञहरूका अनुसार लामो कपालको सही स्याहारसुसार नहुँदा चाया र जुम्रा पर्ने, गर्मीमा पसिना जम्ने जस्ता स्वास्थ्य समस्याका साथै समय र खर्चसमेत बढ्ने गर्छ ।