बाढी प्रभावितसहित विभिन्न जिल्लामा हल्कादेखि मध्यम वर्षा

काठमाण्डाै – आज दिउँसो देशका विभिन्न ठाउँमा हल्कादेखि मध्यम वर्षा भएको छ । बाढी प्रभावित रसुवा, नुवाकोट, धादिङ, गोरखा, चितवन, नवलपरासीसहित सिन्धुपाल्चोक, लमजुङ, सुर्खेतलगायतका जिल्लामा पानी परेको हो । यी जिल्लामा थप पानी पर्न सक्ने मौसम पूर्वानुमान महाशाखाले जनाएको छ ।

बेलुका ५ बजेको विवरणअनुसार १ घण्टामा सबैभन्दा धेरै लमजुङको खुदीबजारमा झन्डै ३८ मिलिमिटर र सुर्खेतको रानीमत्तामा ३१ मिलिमिटर वर्षा मापन भएको छ ।

आज राति कोशी, बागमती, गण्डकी, लुम्बिनी र सुदूरपश्चिम प्रदेशका तराई भागका केही ठाउँ तथा मधेश प्रदेशकाे थोरै ठाउँमा मध्यमसम्म वर्षाको सम्भावना छ ।

कोशी, बागमती र गण्डकी प्रदेशको हिमाली र पहाडी भागका थोरै तथा लुम्बिनी प्रदेशकाे पहाडी र तराई भागको १/२ ठाउँमा ठूलो पानी पर्न सक्ने महाशाखाको अनुमान छ ।