उद्धार, राहत र पुनर्स्थापनाका लागि तीनै तहमा सर्वदलीय संयन्त्र परिचालन गरिने

काठमाण्डाै – भदाै १० गते बुधवार रसुवाको भोटेकोशीमा आएको भीषण बाढीको प्रभावित क्षेत्रमा खोज, उद्धार, राहत वितरण तथा पुनर्स्थापनाका कामलाई प्रभावकारी बनाउन तीनै तहमा सर्वदलीय राजनीतिक संयन्त्र परिचालन गरिने भएको छ ।

आज सिहंदरबारमा बसेकाे सर्वदलीय बैठकले प्रदेश र पालिकामा समेत सर्वदलीय राजनीतिक संयन्त्र निर्माण गरी राहत तथा उद्धारमा परिचालन गर्ने निर्णय भएको नेपाली कम्युनिस्ट पार्टी (नेकपा) का सांसद वर्षमान पुनले जानकारी दिनुभयाे ।

पुनका अनुसार बैठकले विपद्का बेला दलगत राजनीतिभन्दा माथि उठेर सरकारलाई पूर्ण सहयोग गर्ने प्रतिबद्धतासमेत दाेहाेर्‍याएकाे छ ।उहाँले राहत वितरणका लागि सरकारले एकद्वार प्रणाली अपनाए पनि पीडितसम्म राहत पुग्न नसकेको भन्दै पालिकासँग पर्याप्त समन्वय गर्नुपर्नेमा जोड दिएको बताउनुभयो ।

सांसद पुनले विपद्को उद्धार तथा राहतमा निजी क्षेत्रलाई शुरूदेखि नै सहभागी गराउनुपर्नेमा सरकारले त्यस्तो नगराएको विषयमा ध्यानाकर्षण गराइएको उल्लेख गर्नुभयाे ।

यस्तै सर्वदलीय बैठकमा नेपाली कांग्रेसले सुरुङमा फसेका व्यक्तिको उद्धारका लागि अन्तर्राष्ट्रिय विज्ञ तथा प्रविधिको सहयोग लिन सरकारसँग आग्रह गरेको छ ।

कांग्रेसका केन्द्रीय सदस्य देवराज चालिसेले सरकारले उपलब्ध स्रोत साधनबाट प्रयास गर्दागर्दै पनि नसकेकाे अवस्थामा प्राविधिक विषयमा अन्तर्राष्ट्रिय सहयोग लिन कुनै सङ्कोच गर्न नहुने बताउनुभयाे । सरकारले अन्तर्राष्ट्रिय सहयोग लिने वा नलिने विषयमा समयमै निर्णय गर्न नसक्दा उद्धारमा ढिलाइ भएको उहाँकाे भनाइ छ ।

उहाँले भन्नुभयो, ‘मान्छेको जीवन नै प्रधान हो । त्यस कारण उद्धारको विषयमा सरकार संवेदनशील हुनुपर्छ । राहत दोस्रो चरण हो । पुनर्निर्माण तेस्रो चौथो चरणमा जान्छ । अन्तर्राष्ट्रिय सहयोग जुटाउन कुनै लाज मान्नु पर्दैन । हामीसँग उपलब्ध स्रोत र साधनले गर्न नसकेका विषयहरूमा अन्तर्राष्ट्रिय सहयाेग लिनुपर्छ ।’

– न्युज एजेन्सी नेपाल