केरुङमा रहेका एक हजार ४०० नेपाली सुरक्षित, झन्डै १०० जना तातोपानी नाका हुँदै फर्कँदै

काठमाण्डाै – परराष्ट्र मन्त्रालयले रसुवा बाढीपछिको खोज, उद्धार तथा राहतका प्रयासबारे काठमाण्डौमा रहेका कूटनीतिक नियोगका प्रतिनिधिलाई जानकारी गराएको छ ।

आज आयोजित नियमित पत्रकार सम्मेलनमा मन्त्रालयका प्रवक्ता लोकबहादुर पौडेल क्षेत्रीले कूटनीतिक ब्रिफिङ र अन्य समसामयिक विषयमा जानकारी गराउनुभयो ।

चीनको केरुङ क्षेत्रमा रहेका झन्डै एक हजार ४०० जना नेपाली नागरिक सुरक्षित रहेका मन्त्रालयले जनाएको छ । तीमध्ये झन्डै १०० जना नेपाली तातोपानी नाका हुँदै स्वदेश फर्किने क्रममा रहेका प्रवक्ता क्षेत्रीले जानकारी दिनुभयो ।

मन्त्रालयका अनुसार विपद्का कारण घरपरिवार र आफन्त गुमाएका वा तत्काल स्वदेश फर्कनुपर्ने अवस्थामा रहेका नेपालीलाई प्राथमिकताका साथ ल्याउन चिनियाँ पक्षसँग समन्वय भइरहेको छ ।

यसैबीच परराष्ट्रमन्त्री शिशिर खनालले कूटनीतिक समुदायलाई भोटेकोशी बाढीको घटनाबारे ब्रिफिङ गर्नुभएकाे छ । मन्त्री खनालले सरकारको प्राथमिकता प्रभावित नागरिकको जीवनरक्षा, खोज तथा उद्धार र विदेशी नागरिकको सुरक्षा रहेको बताउनुभयो ।

सरकारले विपद्को कारण र यसको विकासक्रमबारे अध्ययन गरिरहेको तथा यसका लागि सम्बन्धित प्राविधिक विज्ञको सहयोग पनि लिइरहेको मन्त्री खनालले बताउनुभयो ।

विशेषगरी रसुवा, नुवाकोट र धादिङका केही क्षेत्रमा विपद्को ठूलो प्रभाव परेको भए पनि नेपालका बाँकी क्षेत्र सुरक्षित र पूर्णरूपमा खुला रहेको उहाँले उल्लेख गर्नुभयाे ।

देशभरका विमानस्थल सामान्यरूपमा सञ्चालनमा रहेको जानकारी दिँदै मन्त्री खनालले काठमाण्डौ, पोखरा, चितवन, लुम्बिनी, जनकपुर, अन्नपूर्ण क्षेत्र, सगरमाथा क्षेत्र र बर्दियालगायतका प्रमुख पर्यटकीय गन्तव्यहरू पर्यटक स्वागतका लागि खुला रहेका बताउनुभयो ।