रास्वपाले राहत वितरणमा छुट्टै संयन्त्र नबनाउने, सरकारलाई सघाउने

काठमाण्डाै – राष्ट्रिय स्वतन्त्र पार्टी (रास्वपा) ले भोटेकोशी बाढीबाट पीडितको उद्धार र राहत वितरणमा छुट्टै संयन्त्र नबनाई सरकारलाई नै सघाउने निर्णय गरेको छ ।

पार्टी केन्द्रीय कार्यालयमा आज बसेको सचिवालय बैठकले विपद् व्यवस्थापनको विषयमा छलफलसहित सरकारले गर्दै आएको कामलाई थप प्रभावकारी बनाउन आवश्यक मद्दत गर्ने निष्कर्ष निकालेको हो ।

त्यस्तै पार्टी कार्यालयमा सङ्कलन भएका राहत सामग्री सरकारको एकद्वार प्रणालीमार्फत वितरण गर्ने रास्वपाको तयारी छ ।

यसअघि सर्वदलीय बैठकमा भएको सहमतिअनुसार प्रदेश र पालिकाको समन्वयमा राहत वितरण गर्नेबारे आजको बैठकमा छलफल भएको प्रमुख सचेतक कविन्द्र बुर्लाकोटीले बताउनुभयो ।

बैठकमा बाढी र विपद्का समयमा सरकारले गरिरहेका प्रयासबारे अर्थमन्त्री डा. स्वर्णिम वाग्लेले ब्रिफिङसमेत गर्नुभएको थियो ।