भोटेकोशी बाढीपछि कोरलानाकामा चाप बढ्यो

काठमाण्डौ – भोटेकोशी बाढीबाट (रसुवा–केरुङ) नाका बन्द भएसँगै कोरलानाकाबाट मालवस्तु ढुवानी गर्न थालिएको छ । रसुवागढी नाका बन्द हुनुअघि औसत ८ देखि १० कन्टेनर मात्रै आवतजावत गर्ने कोरलानाकामा रसुवागढी बन्द भएपछि मालवस्तु बोक्ने ढुवानीका कन्टेनरहरूको सङ्ख्या बढ्न थालेको छ ।

सशस्त्र प्रहरी बल ३३ नं गुल्म हेडक्वाटर जोमसोमका अनुसार रसुवाको विनाशकारी बाढीबाट यो क्षेत्रको रसुवागढी नाका पूर्ण रूपमा बन्द हुँदा कोरलानाकातर्फ मालवस्तु ढुवानी गर्ने कन्टेनरको सङ्ख्या अप्रत्याशित रूपमा बढेको छ ।

गुल्मका सशस्त्र प्रहरी नायब उपरीक्षक दीपक कोइरालाका अनुसार भदौ १० गतेदेखि १८ गतेसम्म (बेनी–जोमसोम–कोरला) सडकमार्ग हुँदै २५२ वटा मालबाहक खाली कन्टेनरहरू कोरलानाकातर्फ गएका छन् ।

यसैगरी, रसुवागढी नाका बन्दपछि एक हप्तामा कोरलानाका हुँदै चिनियाँ मालवस्तु बोकेको ७० वटा मालवाहक कन्टेनरहरू मुस्ताङ भन्सार कार्यालयमा जाँचपास भई गन्तव्यतर्फ प्रस्थान गरिसकेका सशस्त्र प्रहरी नायव उपरीक्षक कोइरालाले बताउनुभयो ।

नेपाल–चीन रसुवागढी–केरुङ नाका विनाशकारी बाढीले ध्वस्त भई बन्द भएपछि त्यहाँको नाका प्रयोग गरी नेपाल भित्र्याइने मालवस्तुहरू कोरलानाकातर्फ डाइभर्ट भएका छन् ।