पहिरोले घोराही–थवाङ सहिदमार्ग र साँफे–मार्तडी सडकखण्ड अवरुद्ध

काठमाण्डौ – पहिरो खसेपछि घोराही–थवाङ सहिदमार्ग र साँफे–मार्तडी सडकखण्ड अवरुद्ध  भएका छन् ।

रोल्पाको परिवर्तन गाउँपालिका–१ खोलावाङमा आज बिहान सडक माथिबाट पहिरो खस्दा घोराही–थवाङ सहिदमार्ग पूर्ण रूपमा अवरुद्ध भएको प्रहरी चौकी कुरेलीले जनाएको छ ।

पहिरो खसेपछि यो सडक हुँदै दाङ, रोल्पा, रुकुम ओहोरदोहोर गर्ने गाडी र यात्रु रोकिएका छन् । पहिरो हटाउने काम भैरहेको प्रहरीको भनाइ छ । यस्तै बाजुराको जिल्ला सदरमुकाम जोड्ने साँफे–मार्तडी सडकखण्ड पनि अवरुद्ध छ ।

गएरातिको वर्षाका कारण मार्तडीको बडीमालिका नगरपालिका–९ कारागार मोड, विनोद स्मृति प्रतीक्षालय, सेलागाड, सुवाकाँधलगायतका ठाउँमा सडक माथिबाट पहिरो खसेको हो ।

जिल्ला प्रहरी कार्यालयबाट प्रहरी सहायक निरीक्षक लक्ष्मी दत्त भट्टको नेतृत्वमा पहिरो हटाउन टोली परिचालन भएको छ ।

टोलीले बडीमालिका नगरपालिका र सडक विभागको उपकरण प्रयोग गरी पहिरो हटाउने पहल गरिरहेको जिल्ला प्रहरी कार्यालय बाजुराले जनाएको छ ।