सिङ्गापुरका प्रधानमन्त्रीको तलब झन्डै ११ लाख डलरले बढ्ने

सिङ्गापुर सरकारले प्रधानमन्त्रीसहित मन्त्री तथा अन्य उच्च सरकारी पदाधिकारीको तलब बढाउने निर्णय गरेको छ । निर्णयअनुसार प्रधानमन्त्री लरेन्स वोङको वार्षिक पारिश्रमिक झन्डै ११ लाख अमेरिकी डलर अर्थात् साढे १६ कराेड रुपैयाँ भन्दा धेरैले बढ्ने बीबीसीले जनाएको छ ।

प्रधानमन्त्री वोङले अहिले वार्षिक २२ लाख सिङ्गापुर डलर तलब पाइरहनुभएको छ । अब उहाँको तलब ६० प्रतिशतभन्दा धेरैले बढेर ३६ लाख सिङ्गापुर डलर अर्थात् २८ लाख अमेरिकी डलर पुग्नेछ ।

प्रधानमन्त्री वोङले आफ्नो तलबमा भएको यो वृद्धि आउँदो पाँच वर्षसम्म परोपकारी कार्यका लागि दान गर्ने बताउनुभएको छ ।

वोङले उत्कृष्ट प्रतिभाहरूलाई आकर्षित गर्न मन्त्रीहरूको तलब बढाउनु आवश्यक रहेको उल्लेख गर्नुभयो । तलब वृद्धि आउँदो अक्टोबर १५ देखि लागू हुनेछ ।

सरकारले यसअघि नै मन्त्रीहरूलाई उच्च तलब दिँदा भ्रष्टाचार न्यूनीकरणमा मद्दत पुग्ने तर्क गर्दै आएको छ । तर रोजगारीको सुरक्षा र बढ्दो जीवनयापनको लागतलाई लिएर गहिरो चिन्ता रहेको सिङ्गापुरमा यो कदमको आलोचना भएको छ । नेताहरूको तलब बढाउने निर्णय नागरिकको समस्याप्रति असंवेदनशील भएको आलोचकहरूको भनाइ छ ।

आफ्नो तलब वृद्धि लागू हुनुअघि नै पनि वोङ विश्वका सबैभन्दा धेरै तलब पाउने नेता हुनुहुन्छ । उहाँपछि हङकङका प्रमुख कार्यकारी जोन लीले झन्डै ७ लाख १९ हजार अमेरिकी डलर र स्विट्जरल्यान्डका राष्ट्रपति गाय पार्मेलिनले झन्डै ६ लाख ६ हजार डलर तलब पाउनुहुन्छ ।

यस्तै अमेरिकी राष्ट्रपति डोनाल्ड ट्रम्पको वार्षिक तलब ४ लाख अमेरिकी डलर छ भने बेलायतका प्रधानमन्त्री एन्डी बर्नहमको तलब झन्डै २ लाख ३० हजार डलर रहेको छ ।

यस्तै नयाँ व्यवस्थाअनुसार मन्त्रीहरूको आधारभूत तलब पनि झन्डै ११ लाखबाट बढेर १२ लाख सिङ्गापुर डलर पुग्नेछ ।

कार्यसम्पादनका आधारमा उनीहरूको वार्षिक आम्दानी कार्यकालको अन्त्यसम्म झन्डै १३ लाख ५० हजार सिङ्गापुर डलरसम्म पुग्न सक्ने खबरमा उल्लेख छ ।

मन्त्रीहरूको पारिश्रमिकको केही हिस्सा देशको बेरोजगारी दर, आम्दानी वृद्धि र कुल गार्हस्थ्य उत्पादन (जीडीपी) वृद्धिजस्ता आर्थिक सूचकमा आधारित हुनेछ ।