भदौ २४ को हिंसा अघिल्लो दिन २३ गतेको घटनाको आवेग थिएन : एमाले

काठमाण्डौ – नेकपा (एमाले) ले गएको वर्ष भदौ २४ मा भएको आगजनी, तोडफोड र क्षति सुनियोजित योजनाको परिणाम भएको दाबी गरेको छ ।

भदौ २४ को हिंसा अघिल्लो दिन २३ गतेको घटनाको आवेग नरहेको एमाले अध्यक्ष एवं पूर्वप्रधानमन्त्री केपी शर्मा ओलीले आज निकाल्नुभएको प्रेस विज्ञप्तिमा उल्लेख छ ।

अघिल्लो वर्ष भदौ २४ मा भएको घटनाको एक वर्ष पूरा भएको अवसरमा आज एमाले अध्यक्ष ओलीले प्रेस विज्ञप्ति निकाल्नुभएको हो । भदौ २३ गतेको शान्तिपूर्ण प्रदर्शनमा विभिन्न समूहले घुसपैठ गरी हिंसात्मक बनाएको उहाँको दाबी छ ।

एमालेले त्यसक्रममा १९ जना युवाको ज्यान गएको उल्लेखसहित श्रद्धाञ्जली तथा घाइतेको शीघ्र स्वास्थ्यलाभको कामना गरेको छ । भीड नियन्त्रणका क्रममा प्रहरीको बल प्रयोगबाट १९ युवाको ज्यान गएको एमालेको दाबी छ ।

एमालेले भदौ २४ मा राष्ट्रपति भवन, प्रधानमन्त्री निवास, सिंहदरबार, संसद् भवन, सर्वोच्च अदालत, राजनीतिक दलका कार्यालय, शहीद तथा अग्रजका स्मारक र सार्वजनिक तथा निजी सम्पत्तिमा भएको आगजनी तथा तोडफोडलाई नेपालको इतिहासकै ‘कालो अध्याय’ भनेको छ ।

साथै विज्ञप्तिमा भदौ २३ को शान्तिपूर्ण प्रदर्शन कसरी हिंसात्मक बन्यो र त्यसका लागि को को जिम्मेवार छन् भन्ने विषयमा गहिरो छानबिन हुनुपर्ने माग गरिएको छ ।