भोटेकोशी बाढीपछि सरकारको राहत–उद्धार कार्यबारे विपक्षी दलकाे समीक्षा

काठमाण्डाै – प्रतिनिधिसभाका विपक्षी दलहरूले रसुवाको भोटेकोशी बाढीपछिको खोज, राहत र उद्धारमा सरकारले गरिरहेको कामको समीक्षा गरेका छन् ।

नेपाली कांग्रेसको आह्वानमा आज सिंहदरबारमा बसेको विपक्षी दलहरूको बैठकमा विपद् प्रतिकार्यमा सरकारले गरिरहेको कामको समीक्षा भएको कांग्रेस प्रमुख सचेतक बासना थापाले बताउनुभएको हो ।

बैठकले विपद् व्यवस्थापन, राहत, उद्धार, खोजी र पुनर्स्थापनाका कार्यहरू प्रभावकारी बनाउन संसदीय विशेष समिति गठन गर्न सरकारको ध्यानाकर्षण गराउने निर्णय गरेको छ ।

नेकपा एमाले संसदीय दलकी उपनेता पद्मा अर्यालका अनुसार सरकारी राहत–उद्धार कार्यको अनुगमन, निरीक्षण, थप सुझाव दिने र संसदीय रूपबाट आवश्यक सहजीकरणका लागि संसदीय विशेष समिति गठन गर्न सरकारको ध्यानाकर्षण गराउने निर्णय भएको हो ।

बैठकले अहिलेसम्म उद्धार तथा खोजीमा खटिएका निकायहरू र भएका कामलाई धन्यवाद दिँदै पूर्वतयारी र शुरुआती चरणमा पर्याप्त सल्लाह–परामर्श एवम् समन्वय नहुँदा केही कमीकमजोरी देखिएको निष्कर्ष निकालेको अर्यालले बताउनुभयो ।

राष्ट्रिय विपत्तिको घडीमा दलीय राजनीतिक स्वार्थ र एजेन्डाहरूलाई पूर्णरूपमा पन्छाएर सरकारसँग हातेमालो गर्ने प्रतिपक्षी दलहरूको साझा प्रतिबद्धता रहेको उहाँको भनाइ छ ।

– न्युज एजेन्सी नेपाल