कानूनमन्त्री गौतमद्वारा राष्ट्रियसभासमक्ष माफी

काठमाण्डाै – कानून, न्याय तथा संसदीय मामिलामन्त्री सोविता गौतमले राष्ट्रियसभाबारे आफूले दिएको अभिव्यक्तिलाई लिएर माफी माग्नुभएको छ ।

राष्ट्रियसभाको आजको बैठकमा मन्त्री गाैतमले आफ्नो अभिव्यक्तिको स्पष्टीकरण दिँदै माफी माग्नुभएको हो । उहाँले जेनजी स्मृति दिवसका अवसरमा आयोजित कार्यक्रममा राष्ट्रियसभामा राष्ट्रिय स्वतन्त्र पार्टी (रास्वपा) को प्रतिनिधित्व नभएका कारण कानून निर्माणमा समस्या भइरहेको अभिव्यक्ति दिनुभएको थियो ।

मन्त्री गौतमको याे अभिव्यक्तिको संसदीय समितिदेखि राष्ट्रियसभामा समेत चर्को आलोचना भएको थियो । आफूले कानून निर्माणमा राष्ट्रियसभाले असहयोग गरेको अभिव्यक्ति नदिएको उहाँको जिकिर छ । उहाँले कानून निर्माण प्रक्रिया जटिल भएको वास्तविक तथ्यलाई राजनीतिक कोणबाट व्याख्या गरिएको भन्दै असन्तुष्टि जनाउनुभयो ।

मन्त्री गाैतमले प्रतिनिधिसभा र राष्ट्रियसभाबीचको समन्वय र सहकार्यलाई अझ प्रभावकारी बनाउन आफूहरू प्रतिबद्ध रहेको पनि उल्लेख गर्नुभयाे ।