भोटेकोशी बाढी प्रभावितको पुनर्स्थापनामा स्राेतको कमी हुँदैन : प्रधानमन्त्री

काठमाण्डाै – प्रधानमन्त्री वालेन्द्र शाहले रसुवाको भोटेकोशी नदीमा आएको बाढीपछिको पुनर्स्थापनाका लागि स्रोतको कुनै कमी हुन नदिने प्रतिबद्धता व्यक्त गर्नुभएको छ ।

प्रधानमन्त्री तथा मन्त्रिपरिषद्को कार्यालयमा बाढी प्रभावित क्षेत्रका जनप्रतिनिधिसँग आज भएको छलफलमा उहाँले याे प्रतिबद्धता जनाउनुभएको हो ।

पुनर्स्थापनाका लागि सरकारले आफूसँग भएको तथा दातृ निकायहरूले उपलब्ध गराएको स्रोत–साधन अधिकतम प्रयोग गर्ने तयारी भइरहेको प्रधानमन्त्रीको सचिवालयले जनाएको छ ।

छलफलका क्रममा प्रधानमन्त्री शाहले विपद्का बेला सङ्घ, प्रदेश र पालिकाबीच प्रभावकारी समन्वय भएकोमा खुशी व्यक्त गर्नुभयो । विगतमा तीन तहका सरकारबीच समन्वय नहुने गरेको सुनिए पनि यस पटक सबै एकै ठाउँमा उभिएर मिलेर काम गरेको उहाँको भनाइ छ ।

यस्तै सरकारले प्रभावित क्षेत्रमा सडक सञ्जाल छिटोभन्दा छिटो सञ्चालन गराउन निरन्तर काम गरिरहेको र सडक खुलाएसँगै जनजीवन सामान्य अवस्थामा फर्कन सहज हुने विश्वास उहाँले व्यक्त गर्नुभयो ।

नदी तटीय क्षेत्रमा रहेका पुराना बस्तीहरू अत्यधिक जोखिममा रहेकाले अब त्यही ठाउँमा पुनः बस्ती बसाल्न सम्भव नभएको प्रधानमन्त्रीले स्पष्ट पार्नुभयो ।

सरकारले प्रभावित क्षेत्र नजिकैको सुरक्षित ठाउँमा वैज्ञानिक ढङ्गले नयाँ बस्ती बसाउने तयारी शुरू गरेको छ । नयाँ बस्ती निर्माण गर्दा प्रभावितहरूको रोजगारी, शिक्षा, स्वास्थ्य, संस्कृति र खेतीयोग्य जमिनको संरक्षणलाई विशेष ध्यान दिइने बताइएको छ । यसका लागि उपयुक्त र सुरक्षित जग्गाको पहिचान गरी सङ्घ सरकारलाई सिफारिश गर्न प्रधानमन्त्री शाहले स्थानीय जनप्रतिनिधिलाई आग्रह गर्नुभएको छ ।