रास्वपाका सभापति लामिछानेको आह्वानमा आज सर्वदलीय बैठक बस्दै

काठमाण्डौ – राष्ट्रिय स्वतन्त्र पार्टी (रास्वपा)का सभापति रवि लामिछानेको आह्वानमा आज सर्वदलीय बैठक बस्दैछ ।

रास्वपाका प्रवक्ता जगदीश खरेलका अनुसार बैठक बिहान ११ बजे सिंहदरबारमा रहेको पार्टीको संसदीय दलको कार्यालयमा बस्नेछ । बैठक मुख्यगरी विपद् जोखिम न्यूनीकरण तथा व्यवस्थापनका लागि उच्चस्तरीय राजनीतिक संयन्त्र गठन गर्ने विषयमा केन्द्रित हुनेछ ।

लामिछानेको आह्वानमा बस्न लागेको यो तेस्रो सर्वदलीय बैठक हो । यसअघि भदौ १० र १६ गते पनि सर्वदलीय बैठक बसेको थियो । भदौ १० को बैठकमा भोटेकोशी बाढी प्रभावित क्षेत्रको अवस्था, खोजी तथा उद्धार कार्यलाई प्रभावकारी कसरी बनाउनेलगायतका विषयमा केन्द्रित रहेको थियो ।

साथै बैठकले बाढी प्रभावितको उद्धार र व्यवस्थापनका लागि उच्चस्तरीय संयन्त्र गठन गर्ने निर्णय गरेको थियो । त्यस्तै भदौ १६ मा बसेको अर्को सर्वदलीय बैठकमा दलहरुबाट दोस्रो तहका नेताहरू सहभागी भएका थिए ।

यो बैठकबाट विपद्को दिगो समाधान र पूर्वतयारीका सम्बन्धमा १० बुँदे साझा सङ्कल्प पारित गरिएको थियो ।